Kryeministri turk, Ahmet Davutogllu, ka kryer një vizitë dyditore në Teheran, ku një prej temave kryesore me pritësit iranianë ka qenë Siria.
Turqia dhe Irani gjenden në kahje të kundërta sa i përket qëndrimit mbi luftën në Siri, por në bisedimet e Davutogllusë me autoritetet iraniane ka patur pajtim në shumë aspekte.
Një prej tyre është integriteti territorial i Sirisë, për të cilin kryeministri turk deklaroi se dy vendet kanë një këndvështrim të përbashkët.
Davutogllu shprehu mendimin se Turqia dhe Siria janë në një mendje mbi nevojën për të mbrojtur integritetin territorial të Sirisë, për t’i dhënë përkrahje ndërprerjes së luftimeve, për përfaqësimin e të gjithë elementëve sirianë në qeverisjen e vendit, e për mosmbështetjen në aktorët e huaj për zgjidhjen e problemeve të rajonit.
Presidenti turk e pati vizituar po ashtu Iranin në prillin e vitit të shkuar.
Dy vendet kërkojnë t’i zgjerojnë marrëdhëniet tregtare pas heqjes së sanksioneve për Iranin, e pavarësisht dallimeve, posaçërisht në lidhje me Sirinë, kanë marrëdhënie të qëndrueshme e të ngrohta diplomatike. /tesheshi.com/
