Kryeministri turk ka gjetur dje vend në të përditshmen amerikane Washington Post, ku ka parashtruar tërë aksionin e qeverisë që kryeson për t’i bërë ballë një përshkallëzimi të situatës në vendin e tij.
Davutogllu e ka bërë të qartë se lufta e shtetit turk ndaj të gjitha organizatave terroriste do të jetë e pakompromis, “Të gjitha organizatat terroriste që vënë në shenjë Turqinë duhet ta dinë se aktet e tyre nuk do të mbeten të pandëshkuara, dhe se do t’u përgjigjemi atyre me vendosmëri të plotë, ndërsa kemi gjithë të drejtën nën ligjin ndërkombëtar.”
Një vend të posaçëm në shkrim ka zënë këndvështrimi i Davutogllusë mbi të ardhmen e iniciativës së kahershme të AKP-së, partisë në pushtet, për t’i dhënë fund konfliktit dhjetëravjeçar me PKK-në.
Vendosmëria e Turqisë për t’iu përgjigjur me forcë akteve të PKK-së nuk nënkupton fundin e “procesit të zgjidhjes,” sipas kryeministrit turk. “Ne jemi të vendosur ta çojmë ‘procesin e zgjidhjes’ drejt fundit të tij logjik sapo të krijohet një qeveri e re,” ka shtuar ai.
Konflikti me PKK-në nuk mund të gjejë zgjidhje gjersa militantët e kësaj organizate të ulin armët, t’u japin fund sulmeve të dhunshme, e t’i largojnë elementët e armatosur nga Turqia, ka theksuar mes të tjerash Davutogllu.
“Siç na mëson historia, ne do të jemi gjithmonë në kërkim të rrugëve për zgjidhje paqësore të konflikteve të mundshme. Por kur kërcënohemi, do të veprojmë pa rezerva, me çdo mjet në dispozicionin tonë, derisa armiku të mundet.”
Aktualisht Turqia po kryen sulme ajrore të njëpasnjëshme ndaj bazave të PKK-së dhe të ISIS-it në Siri dhe Irak, në një luftë të hapur me ta. Në vend ka patur me qindra arrestime, në përpjekje për të parandaluar destabilizimin e mëtejshëm të situatës. Ndërkaq, militantët kurdë vazhdojnë të kryejnë vrasje dhe rrëmbime personash. Pas një bisede telefonike javën e shkuar mes presidentit amerikan, Obama, dhe atij turk, Erdogan, dy shtetet kanë rënë dakort për veprime të bashkërenduara, në kuadër të së cilave Turqia e ka hapur aeroportin ushtarak të Inxhirlikut në Adana për avionët amerikanë e të aleatëve që kryejnë sulme mbi objektivat e ISIS-it në Siri. /tesheshi.com/
