Nga Entela Canaj
Danilo Zeka është ndër të paktët artistë shqiptarë që ka mundur të depërtojë fuqishëm në skenën e teatrit grek në një periudhë të vështirë për ne shqiptarët, në vitin e mbrapshtë 1997, por jo vetëm kaq… ai ka arritur të jetë aty më i suksesshmi edhe mes vetë vendasve duke u shpallur ‘balerini i parë’ në Teatrin e Operas dhe Baletit në Athinë.
Karriera
Një karrierë e sukseshme, në një vend jo shumë miqësor për ne shqiptarët, dhe e gjitha kjo falë talentit dhe forcës së tij për t`u përballur me vështirësitë. Balerini shqiptar me famë në Greqi vjen në një rrëfim për jetën dhe karrierën e tij, nga emigrimi në vitiin 1997 e deri më sot ku ai ka kapur majat e karrierës. Tregon se fillimi për të ishte shumë i vështirë dhe se i është dashur të përballet me sfida e paragjykime të shumta. “Çdo fillim i ri është i vështirë, sidomos në moshë të vogël siç isha edhe unë. Ishte vërtet një fillim shumë i vështirë sepse nuk njihja gjuhën kulturën e as ambientin grek! Paragjykimet sigurisht ishin edhe janë akoma prezente për ne shqiptarët, por kur njerëzit të njohin ndryshon gjithçka. Tani është e vërtetë që gëzoj respektin e plotë, të gjithe kolegëve të mi edhe njerëzve që unë njoh. Përsa i përket zanatit gjithçka është vlerësuar në saj të talentit e jo të kombësisë. Sot them se marrëdhëniet mes grekëve dhe shqiptarëve janë shumë më të mira sesa në fillimet kur unë kam ardhur në Greqi. Megjithatë paragjykime ka plot dhe mbase edhe racizëm në disa raste, por besoj se nuk ka vend në botë ku gjithçka të jetë perfekte. Zanati jonë është shumë kompetitiv dhe sigurisht ka edhe shumë xhelozi por që mbetet vetëm në anën e zanatit. Marrëdhëniet e mia me kolegët janë shumë të mira e të qëndrueshme”, tregon Danilo për punën në Teatrin e Athinës.
Ofertat
Në këto vite ka pasur shumë teatro prestigjozë operistikë nëpër botë nga Londra në Amsterdam, që i kanë propozuar t’iu bashkohet trupës së tyre teatrale, por Danilo nuk ka pranuar. Ai thotë se teatri grek po ashtu është i një niveli të lartë profesional, dhe nga ana tjetër është mësuar me ritmin e jetës në Greqi. “Teatri i Athinës është i një niveli të lartë, sidomos vitet e fundit ka pasur shumë rritje profesionale. Unë jam i kënaqur me arritjet e mia në karrierën time sepse jam vlerësuar nga shumë artistë të nivelit botëror me të cilët kam pasur fatin të bashkëpunoj. Kam pasur disa oferta sikurse ja vlen të përmenden ajo nga ‘Teatri Nacional i Amsterdamit’; ‘English national i Londrës’, një kompani nga Montreali etj… por i kam refuzuar sepse mua më pëlqen jeta këtu në Athinë dhe jo vetëm zanati”, thotë Danilo.
Rikthimi në Tiranë
Është kthyer në Shqipëri dy vite më parë pas një ftese që iu bë në shfaqjen ‘Endërr e një nate vere’ në TKOB, ndërsa për rikthimin e radhës , thotë se nuk varet vetëm nga ai por edhe nga ftesat që do ti bëhen sërish nga Tirana. “Rikthimi im i shumëpritur në Teatrin e Tiranës ishte mbas shumë vitesh dhe ishte një eksperiencë fantastike, por kam frikë se nuk varet vetëm nga unë për një rikthim të shpejtë, sepse në radhë të parë është çështje programi dhe e dyta duhet bërë një ftesë zyrtare nga teatri. Sigurisht do më pëlqente, është gjithnjë kënaqësi ta prek skenën ku unë kam hedhur hapat e para e më të rëndësishme në karrierë”, thotë më tej Danilo.
Kombësia
Tregon se në evenimente të rëndësishme ku është zgjedhur për të prezantuar Greqinë, kanë dashur ta prezantojnë si balerin grek, por ai asnjëherë nuk ka pranuar, dhe thotë se është krenar për kombësinë e tij shqiptare. “Të ndryshoj kombësi nuk më është kërkuar kurrë, por disa herë ka pasur tentativa për të më prezantuar si balerin grek duke marrë pjesë në disa aktivitete dhe shfaqie të rëndësishme. Unë jam, kam qenë dhe do jem gjithmonë krenar i kombësisë time e do ta mbroj atë gjithmonë me fanatizëm”, thotë Danilo.
Mendon se artistët në Shqipëri janë shumë të talentuar por nuk kanë vëmendjen e duhur nga shteti, megjithatë gjërat kanë nisur të ndryshojnë disi. “Gjërat janë në rrugën e duhur, megjithatë ka shumë vend për përmirësime sidomos në aspektin e infrastrukturës, sepse besoj se do ndikoj edhe në rritjen e cilësisë. Arti si dhe çdo zanat tjetër kanë shumë nevojë për investime dhe vëmendjen e shtetit, sepse arti është shumë i rëndësishëm në shoqëri, bashkon njerëzit e të gjitha shtresave dhe ndihmon në jetën e përditshme nga ana shpirtërore e morale”, thotë Danilo. /tesheshi.com/
