Manchester City e kryeson bindshëm Premier League-n, është një prej pretendentëve për të fituar Champions League-n, por nuk mundet të kalojë një ekip të një kategorie të ulët në një të tetat e FA Cup-it.
Wigan Athletic, që mban vendin e tretë në League One, një kategori e tretë e futbollit anglez, i ka bërë një surprizë të pakëndshme skuadrës më të mirë të Premier League-s.
Eshtë i njëjti ekip që e ka mundur Man. City-n dhe në finalen e 2013-s në të njëjtën veprimtari, me një gol të çasteve të fundit.
Wigan ka fituar mbrëmë 1-0 ndaj Man. City-t dhe është kualifikuar për në çerekfinale; goli i vetëm është shënuar nga Grigg në minutën e 79-të.
Delph do të nxirrej jashtë me karton të kuq për miqtë në fundin e pjesës së parë për një ndërhyrje të gabuar, çka solli një përplasje të Guardiola-s me teknikun e Wigan-it, Paul Cook, në tunelin për në dhomat e zhveshjes.
Kryesuesit e kampionatit anglez e patën në 83 për qind të lojës zotërimin e topit, krijuan një mori rastesh, por nuk ishte mbrëmja e tyre. Për ta qe hera e tretë në këtë sezon që e mbyllin një ndeshje pa shënuar.
Në fund të takimit nuk mungoi dhe një zënkë e Aguero-s me një prej tifozëve të Wigan-it.
I nervozuar, Guardiola e pranoi sidoqoftë humbjen, “Bëmë absolutisht gjithçka. Bëmë një gabim, dhe kjo ndeshje është si një finale. Po, e pranojmë humbjen. Urime fituesit!” /tesheshi.com/
