Një vizitë e kryeministri Edi Rama në Azerbajxhan, ku potencon faktin se mes tyre është Turqia, duhej patjetër të kishte një synim të madh. Kështu, në përfundim të vizitës së tij dy ditore në Baku, ai ka folur për një projekt të rëndësishëm mes qeverisë shqiptare dhe asaj azere.
Ai tha se po punohet mes dy qeverive për gazifikimin e Shqipërisë, duke ndërtuar një rafineri në bashkëpunim me Turqinë dhe Azerbajxhanin.
“Do të punojmë shumë ngushtësisht për gazifikimin e Shqipërisë. Hapi i parë është nisja e një pune konkrete për gazsjellësin jonmiano-adriatik, i cili përmes TAP-it lidh pjesën e sipërme, Shqipërinë me Malin e Zi, Kroacinë dhe Bosnjen, duke e kthyer Shqipërinë në një nyje shumë të rëndësishme.
Kemi folur edhe për t’u ulur së bashku ekspertët tanë, azerë dhe turq për të eksploruar
mundësinë e ndërtimit të një rafinerie të re. Kemi folur edhe për mundësinë e investimeve të Azerbajxhanit në turizëm, duke patur parasysh investimin e tyre në Malin e Zi. Së shpejti në Tiranë do të kemi një hap të parë shumë të rëndësishëm përsa i përket kapitullit të furnizimit me gaz të Shqipërisë dhe rajonit.
Investimet janë të lidhura me hapa të njëpasnjëshëm me diskutime, projekte dhe financime.
Në këtë marrëdhënie ne i kemi vendosur bazat dhe një pengesë e madhe ka qenë pandemia. Ndërkohë, lufta në Ukrainë ndër shumë të këqijat, ka sjellë edhe të mirat në shpejtimin e këtij procesi”, sqaroi i pari i qeverisë shqiptare.
Pra, thënë me fjalë të tjera: atë që Shqipëria nuk e përfiton dot nga gazjellësi TAP, që sipas marrëveshjes së qeverisë së mëparshme thjesht kalon në Shqipëri por pa përfitime potenciale për Shqipërinë, synohet ta marrë duke u bërë faktor në tregun e gazit me anë të një rafinerie.
Ose ose, vërtet po rafshohet Rafineria e Ballshit, por një tjetër do ngrihet në vend të saj, edhe pse jo në atë vend. /tesheshi.com/
