Sulmuesi brazilian Philippe Coutinho ka nënshkruar një kontratë të re pesëvjeçare me Liverpulin, çka do të thotë se marrëveshja e re do t’i mundësojë atij qëndrimin gjer në 2022-shin.
Kontrata e re parashikon një pagesë prej rreth 150.000 paundësh në javë për të, siç bën me dije BBC-ja, një shifër që e bën atë lojtarin më të paguar te Liverpuli.
“Eshtë një klub së cilit i jam shumë mirënjohës, dhe kjo tregon lumturinë time këtu,” i ka thënë braziliani faqes elektronike të Liverpulit.
“Nënshkrova këtë kontratë të re për të qëndruar këtu për ca vite të tjera, sepse është një nder i madh për mua.”
Jurgen Klopp, tekniku gjerman i Liverpulit, e priti gjithashtu lajmin me mjaft kënaqësi. “Ky është një lajm i mrekullueshëm. Ai (Coutinho) është vërtet i klasit botëror. Ai di si mund t’i përmbushë ambiciet dhe ëndrrat këtu te Liverpuli.”
Coutinho iu bashkua Liverpulit në janar të 2013-s, për të shënuar 34 gola në 163 takime ku është aktivizuar. /tesheshi.com/
