Champions League i vë përsëri karshi dy ekipet e njohura të Madridit, Realin e Atletikon, në gjysmëfinalen e parë të këtij aktiviteti, që do të luhet sonte.
Reali vjen në këtë sfidë si gjithmonë, i pangopur në ambiciet e veta për sa më shumë trofe të fituar. Një fitore sonte do të ishte një hap drejt finales.
Atletiko, në anën tjetër, do të jetë përballë skuadrës që në sezonet e fundit ia ka prerë rrugën e suksesit në Champions League. Në fillim të sezonit, me paraqitjet e dobëta të vjeshtës së vitit të shkuar, dukej e pamundur për Atletikon që të mbërrinte sërish në këtë pikë. Veç një humbjeje me Vilarealin ditë më parë, Atletikon e gjen kjo gjysmëfinale në një moment goxha të mirë.
E përditshmja sportive spanjolle Marca ka bërë një analizë të faktorëve që mund të ndikojnë në përfundimin e derbit të kësaj mbrëmjeje.
Kështu, më së pari përmenden dy mbrojtësit anësore të Realit me tipare krejtësisht sulmuese, Marcelo dhe Carvajal. Aq më tepër që tek Atletiko do të ketë mungesa pikërisht në ato pozicione.
Atletiko e gjen epërsinë te forma e portierit Oblak, që është shumë më lart dhe në statistika ndaj Keylor Navas-it.
Thyeshmëria në mbrojtje e Realit është një tjetër faktor që mund t’i japë avantazh Atletikos. Në 53 ndeshje, Reali e ka mbajtur portën të paprekur vetëm në dhjetë prej tyre, ndërsa ka pësuar gol në sfidat e tjera.
Varësia e Realit nga Ronaldo është një tjetër minus, sipas Marca-s, që thekson mbështetjen e Atletikos si te Griezmann, ashtu dhe te Gameiro.
Madrilenët e francezit Zinedine Zidane, mbrojtësa a sulmues, Ronaldo, Ramos, Benzema, Varane, mes të tjerëve, janë një kërcënim i vazhdueshëm për portën kundërshtare në topat në ajër. Të katër të sipërpërmendurit janë shënues të rregullt në krosimet nga ajri brenda zonës.
Isco apo Asensio? Cili prej tyre do të luajë në vend të uellsianit Bale, i pamundur për të qenë në formacionin kryesor.
Casemiro, një element kyç te Reali, ka vuajtur në ndeshjet e fundit nga ndëshkimet e shpejta me karton të verdhë, që kanë ndikuar më pas në lojën e tij dhe të skuadrës. Nëse rishtas ngjet kështu, do të ishte më e lehtë për Atletikon.
Problemet fizike të belgut Carrasco shqetësojnë Atletikon, por prania e tij në fushë, thotë Marca, do të ishte një dhimbje koke më shumë për Realin. Gjendja e tij ka për të qenë kyçe në mundësitë e krijuara për Atletikon, përfundon analiza e Marca-s. /tesheshi.com/
