Në një fjalim të mbajtur dje para ministrave dhe anëtarëve të parlamentit, kryeministri i Greqisë, Aleksis Cipras, i ka akuzuar kreditorët ndërkombëtarë për përpjekje për ta “poshtëruar” vendin, si dhe i ka bërë thirrje Europës ta rishqyrtojë mbështetjen për propozimet e Fondit Monetar Ndërkombëtar për reformë të ashpër.
“Përcaktimi i shkurtimeve… është me shumë gjasa pjesë e një plani politik… për ta poshtëruar një popull të tërë, që ka vuajtur në pesë vitet e shkuara pa asnjë faj të tijin,” qenë fjalët e Ciprasit për ligjvënësit e Syriza-s.
Kryeministri grek nuk u e uli aspak tonin kur vijoi më tutje, duke e ngarkuar FMN-në me “përgjegjësi penale” për situatën e sotme të Greqisë, “Ka ardhur koha që propozimet e FMN-së të gjykohen në publik… nga Europa.”
Cipras u takua më herët të martën me rivalët politikë në një raund këshillimesh në kërkim të mbështetjes për një marrëveshje të mundshme dy javë përpara skadimit të programit të shpëtimit.
Greqia po përballet me një dalje të mundshme nga eurozona, të quajtur ndryshe dhe “Grexit”. Situata është e vështirë për Greqinë, ndërsa ajo duhet t’i paguajë FMN-së 1.6 miliardë euro gjer në fund të muajit, përpos 6.7 miliardë eurove të tjera për Bankën Qendrore Europiane në korrik dhe në gusht. /tesheshi.com/
