Siç po duket, tashmë Henri Çilin do e shohim më shpesh ne studiot e debateve politike pas një fare kohe tërheqjeje prej tyre. Misioni i tij tashmë është që të mbrojë disa prej reformave të qeverisë Rama.
Kështu, edhe mbrëmjen e së mërkurës ai ishte në studion e Eni Vasilit, ku në krah kishte deputetin socialist, Alfred Peza dhe përballë ish-zv/ministrin e Mbrojtjes të hatërmbetur me Ramën, Dritan Hila me sekretaren e marrëdhënieve me publikun në PD, Grida Duma.
I gjithë debati u përqëndrua më tepër tek dyshja Çili – Duma, ku i pari rrekej të argumentonte ftohtësisht deri dhe me argumenta akademikë se pse Rama ishte “në rrugën e duhur” në disa prej reformave të nisura, ndërsa e dyta i qasej më tepër politikisht oponencës së saj duke përfunduar deri në ligjërime patetike.
Interesant është fakti se deri para pak vitesh, si Duma e si Çili ishin pak a shumë në të njëjtin pozicion politik, ndërkohë që dhe sekretarja demokrate, tashmë ndër më aktivet në aksionin opozitar – njëfarë “Jozefine” e re në PD që si deputete e ardhshme dhe mund ta dublojë fuqishëm politkanen e ashpër shkodrane – ka dalë nga “kuzhina akademike” e UET-it për t’iu futur politikës. /tesheshi.com/
