Sipas të dhënave të fundit, të paktën 1651 persona kanë humbur jetën, ndërsa 11119 janë lënduar nga tërmetet që goditën dje pjesët jugore të Turqisë, transmeton Anadolia.
Të dhënat e fundit për numrin e viktimave në tërmetet, me epiqendër në qytetin jugor të Turqisë, Kahramanmaras, i ka bërë të ditur ministri i Shëndetësisë, Fahrettin Koca.
Koca konfirmoi në konferencën për media se numri i të vdekurve është rritur në 1651, ndërsa numri i të lënduarve në 11119. Ai shtoi gjithashtu se 3741 ndërtesa u shembën nga tërmetet.
Një tërmet me magnitudë 7.7 ballë të shkallës Rihter ka goditur mëngjesin e djeshëm Turqinë jugore. Epiqendra e tërmetit është regjistruar në rrethin Pazarcik në Kahramanmaras të Turqisë. Provincat e Gaziantep, Sanliurfa, Diyarbakır, Adana, Adiyaman, Malatya, Osmaniye, Hatay dhe Kilis janë prekur rëndë nga tërmeti. Tërmeti është ndjerë edhe në Sirinë fqinje, ndërsa lëkundjet e tokës janë ndjerë edhe në Irak, Liban, Egjipt dhe rajone të tjera.
Më pas një tërmet i ri me magnitudë 7.6 ballë të shkallës Rihter goditi rrethin e Elbistanit, gjithashtu në Kahramanmaras, në orën 13:24.
Ekipet e shumta të shpëtimit janë ende në terren dhe vazhdojnë kërkimin për të mbijetuar nën rrënojat në disa qytete turke.
Presidenti i Turqisë, Recep Tayyip Erdogan, tha se ky vend u trondit nga fatkeqësia më e madhe që nga tërmeti i Erzincanit në vitin 1939 dhe shpalli 7 ditë zi kombëtare. /tesheshi.com/
