Liderët e grupit A, Paris St Germain dhe Real Madrid kanë barazuar pa gola në sfidën e luajtur në Parkun e Princave në Francë. Në fak,t dy skuadrat shfaqën më të mirën nga repertori i tyre, por asnjëra skuadër nuk gjeti çelësin për t`i hapur portat respektive. Kevin Trapp dhe Kaylor Navas kishin mbyllur derën për një gol të mundshëm në këtë përballje, duke lënë letrat e hapura për sfidën kthyese që luhet pas dy jave në Santiago Bernabeu.
Në sfidën tjetër të grupit A, Malmoe ka befasuar skuadrën e Shakhtar Donetsk, (1-0). Më këtë triumf suedezët ngjiten para ukrainasve në vendin e tretë, për të cilën do luftojnë deri në fund, pasi ky pozicion i mundëson vazhdimin e garave në Europa League.
Në grupin B, Wolfsburg ka marrë kryesimin e grupit. Falë fitores ndaj PSV Eindhoven, gjermanët i prijnë “valles” me gjashtë pikë të tubuara. CSKA Moska ndal Manchester United në barazimin (1-1) dhe ndanë pozitën e dytë në renditjen tabelare me nga katër pikë. Shpresa ka edhe për holandezët e Eindhoven që pavarësisht pozitës së fundit ka vetëm tre pikë më pak se lideri Wolfsburg, kur kanë mbetur edhe tri ndeshje deri në përfundimin e fazës së grupeve.
Atletico Madrid e ka “bombarduar” Astanan, (4-0), duke i mësuar kështu kazakët më së miri për rëndësinë që ka ky kompeticion. Galatasaray ka mposhtur Benfican në shtëpi, (2-1) dhe ka bërë edhe më paqartë situatën në grupin C, pasi dallimi në pikë ndërmjet skuadrave është shumë i vogël.
Fati është sërish me Manchester Cityn. Pas fitores në kohën shtesë në Gjermani ndaj Moenchengladbach, qytetarët regjistrojnë një tjetër fitore “in extremis”, duke mposhtur kësaj here spanjollët e Sevillas, (2-1). Juventus në sfidën tjetër të grupit D, barazoi pa gola me Borussia Moenchengladbach.
/tesheshi.com/
