Pa dyshim që rezultati më befasues i tetë ndeshjeve të dyta të javës së katërt të fazës në grupe të Champions League-s është ai i i kryeqytetit polak, ku Legia vendase barazoi 3-3 me Realin e Madridit.
Në të njëjtin stadium, Borusia e Dortmundit kishte fituar 0-6 më 14 shtator! Pa asnjë tifoz në të, duke kryesuar 0-2, Reali lëshon pe, për të kaluar më pas në humbje. Goli i barazimit vjen në minutën e 85-të!
Po në grupin F, Borusia e Dortmundit fitoi 1-0 ndaj Sportingut të Lisbonës, duke garantuar kalimin në fazën tjetër të aktivitetit.
Zhgënjyes qe dhe barazimi i Juventusit me Lionin në Torino. Higuain shënoi me 11-metërsh në fillim të pjesës së parë, ndërsa Tolisso barazoi për miqtë nga fundi i pjesës së dytë, me të tërë takimin të mbyllur 1-1.
Fitorja më e thellë në mbrëmjen e së mërkurës qe ajo e Seviljes, që mposhti 4-0 Dinamon e Zagrebit. Pastër, 3-0, fitoi dhe Monako ndaj CSKA-së së Moskës, me dy prej golave të shënuar nga Falkao.
Totenhemi u dha një goditje shpresave për ta kaluar grupin me humbjen 0-1 në shtëpi ndaj Bajer Leverkusenit. Megjithatë, për të mbetet gjithçka e hapur në grupin E.
Kopenhageni dhe Lestër Siti u ndanë në barazim pa gola, duke i bërë kampionët e Anglisë t’i afrohen mjaft pranë kualifikimit, pasi mbajnë vendin e parë në grupin G.
Porto fitoi 1-0 me Bryzhin. Tre pikë të çmuara për portugezët, që renditen të dytët po në grupin G.
Rekordi negativ i tetë grupeve u përket Bryzhit e Dinamos së Zagrebit, që nuk kanë marrë ende asnjë pikë. Madje skuadra kroate nuk ka shënuar ende një gol, me një golavarazh -12; Bryzhi më së paku ka realizuar një herë. /tesheshi.com/
