Ramush Haradinaj është rizgjedhur edhe për një tjetër mandat në krye të Aleancës Për Ardhmërinë e Kosovës. Në Kuvendin e VII zgjedhor të AAK-së, Haradinaj nuk pati asnjë kandidat rival, ndërsa u rizgjodh si kryetar partie me 527 vota pro, 3 kundër, kurse 2 vota u shpallën të pavlefshme.
Para se të niste votimi, Haradinaj, në fjalimin e tij drejtuar delegatëve tha se, duhet punuar për t’i dhënë vlerë sistemit politik e shoqëror në Kosovë.
“Qëllimi ynë është i qartë dhe i thjeshtë. T’i japim shpirt Kosovës, ndienjë dhe vlerë vendit tonë. Duhet t’i japim demokracisë së Kosovës shpirt, ndienjë, vlerë, në mënyrë që të jetë burimore dhe e vërtetë. T’i japim shpirt, ndienjë e vlerë sistemit politik, institucional e shoqëror. Kjo, për të pasur mundësi ta kthejmë Kosovën në një vend të suksesshëm, e që ta afrojmë më shpejt drejt familjes së madhe europiane, drejt atyre që aspirojmë se u takojmë, por…po e shpjegoj me dy fjalë këtë. Duhet ta bëjmë Europën në Kosovë, e jo të shkojmë ne në Europë; duhet ta thellojmë miqësinë me Amerikën jo duke shkuar atje, por duke e bërë Kosovën si Amerika. Duhet ta bëjmë Kosovën të denjë për të qenë në NATO”, tha Ramush Haradinaj, kryetar i AAK-së. /tesheshi.com/
