Nga Bekim Laci
Dorëheqjet e zyrtarëve të lartë të Bashkimit Demokratik për Integrim, Arben Labënishti dhe Hazbi Lika, i kanë dhënë tronditjen e parë serioze partisë shqiptare në pushtet.
Në dorëheqjet, ata shprehin revoltën nga bashkqeverisja me partinë maqedonase VMRO, duke i dhënë qeverisë epitetin antishqiptare, por ankohen edhe për mosrespektim të procedurave brenda partiake.
Por hiç më mirë nuk qëndron as Partia Demokratike Shqiptare në opozitë, në të cilën zhvillohet një luftë e brendshmë për legjitimitet mes Menduh Thaçit dhe krahut reformist të Zijadin Selës, i cili akuzon Thaçin se ka privatizuar partinë.
E tërë kjo situatë, për analistët politikë është diçka e pritur, që madje mund të rezultojë me një “domino efekt” të cilin në masë të madhe e dikton edhe afera e përgjimeve që po nxjerr në shesh të gjitha keqpërdorimet e grupeve të interesit brenda partive. Zëri kritik kundër nxënies së partisë nga grupe klanore do të vijë duke shtuar, është konstatimi i tyre.
Ish-Ministri i Arsimit, Sulejman Rushiti, duke komentuar këto zhvillime, për portalin ‘tesheshi’,thotë se pas aferës së përgjimeve, asgje më nuk do të jetë siç ka qenë:
“Ky është momenti kur fillon katarza e madhe në politike dhe kësaj nuk do t’i shpëtoje asnjë subjekt ose individ. Mendoj që BDI u vonua të distancohet nga politika e VMRO-së, andaj, tani do të vazhdoje trendi i individëve të cilët do të largohen për të shpëlarë veten nga njollat e turpit. Pra, të gjithë ata që nuk janë peng të klaneve oligarkike do të marrin vendime të njëjta” shprehet Rushiti.
Analisti politik Arsim Zekolli, thotë se momenti kohor është më me rëndësi dhe më indikativ se vetë arsyetimet e shprehura në tekstet e doreheqjeve gjatë dhe bukur të argumentuara. Kjo sipas tij lë për të kuptuar se dorëheqjet nuk janë reagim emocional, por reagim i menduar mirë si pasojë e rrethanave të reja në parti dhe vend:
“Pakënaqësia është evidente nga dominanca e krahut pro-VMRO në drejtimin e partisë që dikton përzgjedhjet e kuadrove dhe politikave që shkojnë përshtati palës maqedonase dhe në kurriz të shqiptarëve. Sabotimi konstant nga ana e Musa Xhaferit si partner besimi i VMRO-së, në BDI, kundrejt Hazbi Likës, Teuta Arifit, Arben Labënishtit por edhe kundër shqiptareve në Shkup dhe Kumanovë, tanimë dëshmon atë që moti dyshonim – se lider i vërtetë i BDI-së, është Musa Xhaferi, i cili fal partneritetit me Sasho Mijalkov ka suprimuar moti peshën e Ali Ahmetit si lider protokollar por impotent”, thotë Zekolli.
Arben Labënishti, ish-deputet, dhe tani edhe ish Zv. Ministër i Mbrojtjes, ka akuzuar drejtuesit e BDI-së se janë bërë bashkë dhe nuk duan që strukturat të pasurohen dhe të konsolidohen me prurje të reja të cilët do të drejtojnë dhe qeverisin me përgjegjshmëri dhe dinjitet në interes të popullit shqiptar, që në fakt është një nga arsyet për themelimin e subjektit politik BESA, thotë për portalin ‘tesheshi’ Afrim Gashi nga kjo lëvizje, sipas të cilit në këtë vend nuk është me rëndësi ku e me çfarë suksesi ke mbaruar studimet ose specializimet, por është shumë me rëndësi a je i dëgjueshëm ndaj liderit të partisë:
“Në të gjitha paraqitjet tona publike, vazhdimisht themi se për ne me rëndësi janë dituria para injorancës, morali para mashtrimit dhe puna para dembelizmit, ndërsa me vetë faktin se në rradhët tona po afrojmë kuadrot më të mira që kemi në dispozicion, japim mesazhin se cila është qasja jonë ndaj njerëzve me vlera në këtë vend”, shprehet Gashi.
Dorëheqjet e fundit në BDI paraqesin kulminacionin e pakënaqësive të shumta brenda subjektit politik shqiptarë, të cilat u artikuluan haptaz në kongresin tematik mbajtur kohë më parë, ndërsa më herët, deputetët Zulfi Adili, Xhevat Ademi dhe Hazbi Lika kundërshtuan propozimin për stemën e re, për çka paralajmëruan votimin kundër nëse futet për votim në Kuvend, edhe pse për stemën ekzistonte marëveshje mes partnerëve të koalicionit BDI-VMRO. /tesheshi.com/
