Në artikullin e tij, gazeta Daily Telegraph nën një analizë të bërë nga Sejid Husein Mousavian -një studiues në Universitetin Princeton dhe ish-zëdhënës zyrtar për negociatat bërthamore me Iranin- thotë se pesë janë pistat e asaj që mund të ndodhë në qoftë se bisedimet bërthamore me Iranin nuk arrihen. Analisti mendon se Perëndimi duhet ta “rrahë hekurin sa është i nxehtë”, për të arritur një marrëveshje me Iranin, sepse në të kundërt situata do përfundonte shumë keq.
Mousavian vuri në dukje se në qoftë se presioni i tanishëm politik i udhëhequr nga Izraeli apo Kongresi Amerikan, ia arrin të minojë çdo lloj marrëveshje bërthamore me Iranin, atëherë negociatorët do të përballen me pesë mundësi:
Mundësia e parë: rinovimi i marrëveshjes së tretë të përkohshme të nënshkruar në Gjenevë në 2013, e cila ka gjasa të mos pranohet nga Irani pasi kjo do të thotë mbetja në fuqi e sanksioneve, përveç ngrirjes së programit të zhvillimit bërthamor, çka kufizon mundësitë e Presidentit iranian Hasan Rohani, për të përmbushur premtimet e tij për reforma ekonomike.
E dyta është një marrëveshje e re e përkohshme dhe kjo nuk do të jetë një marrëveshje gjithëpërfshirëse siç e shpreson shumë kush, por megjithatë mund të arrijë të marrë zotimin e Iranit mbi programin e tij bërthamor duke hequr disa sanksione.
Mundësia e tretë është se nëse Kongresi amerikan ia arrin –nën trysninë e kryeministrin izraelit Benjamin Netanyahu- të minojë çdo lloj marrëveshje bërthamore, atëherë do të kemi një eskalim në procesin e shkëmbimit të gjuhës së urrejtjes dhe në këtë rast Shtetet e Bashkuara nuk do jenë më në gjendje për të mobilizuar partnerë të tjerë që t`i imponojnë më shumë sanksione Iranit. Opsioni i vetëm që do të mbetej këtu do të ishte vendosja e sanksione të reja në mënyrë të njëanshme, çka cënon efektshmërinë e tyre.
Mundësia e katërt është që Amerika të hyjë në luftë, dhe pasojat e një lufte të tillë do të ishin katastrofike për Iranin, SHBA-të dhe Izraelin, plus lindja e mesme mund të degradojë në gjendje kaosi dhe luftërash civile çka mund të bëjë që situata të dalë nga kontrolli.
Mundësia e pestë –nëse dështojnë këto marrëveshje- është tërheqja e Iranit nga traktati për mospërhapjen e armëve bërthamore dhe nga të gjitha marrëveshjet e tjera kufizuese për armët e shkatërrimit në masë.
Dhe kjo sërish do të ishte një ngërç më vete. Mesa shohim pra e vetmja mundësi që ka bota perëndimore për ta trajtuar problemin e Iranit, është arritja e një marrëveshjeje me të dhe ai moment është pikërisht tani. Në të kundërt, kjo qelizë e huaj për globin mund edhe të bëhet e pamenaxhueshme, në mes një morie situatash që nuk po menaxhohen dot më në Lindje të mesme. (shënimi i përkthyesit)
Burimi: Daily Telegraf, përshtati E.P
