Silvio Berlusconi, ish-kryeministri më jetëgjatë në Itali, është shpallur i pafajshëm nga shkalla më e lartë e gjyqësorit për akuzën prostitucion ndaj minorenëve në procesin e quajtur “Rubby” siç quhet vajza me origjinë egjiptine, e cila pranoi në prokurori se ka shkuar me kreun e qeverisë së asaj kohe.
Pas një konsultimi prej 9 orësh, Gjykata e Kasacionit ka shpallur të pafajshëm ish-kryeministrin Berlusconi nga akuzat e abuzimit dhe prostitucionit mbi minorenët. Në shkallën e parë lideri i partisë Forza Italia ishte dënuar me 7 vjet burg nga gjykata e Milanos. Në apel u mbyll çështja dërsa tani gjykata më e lartë ka vendosur të hedhë poshtë ankesën e prokurorisë.
Komenti i parë pas vendimit ka qenë nga Giovanni Toti, këshilltari politik i Berlusconi-t, sipas të cilit “kemi një lajm të mirë tregon vetëm një pjesë të vogël të asaj që ka hequr Berlusconi dhe të gjithë të moderuarit e së djathtës në këto vite”.
Prokurori i Kasacionit që mbrojti akuzën ka bërë të ditur se ka pasur presion të madh. Gjatë parashtrimit ai tha se akti më i rëndë që ka kryer kryeministri ka qenë ai i shpërdorimit të detyrës duke marrë në telefon shefin të kabinetit të policisë së Milanos për ta liruar vajzën nga paraburgimi ku ndodhej për vjedhje. Në këtë rast mbetet “lapidare” justifikimi i Berlusconi-t për vajzën: “Është mbesa e Hysni Mubarakut”. Sipas prokurorisë ish-kryeministri e ka ditur se vajza ka qenë e mitur, por avokatët kanë luajtur me moshën e vajzës. Në vendimin e gjykatës megjithatë nuk mohohen orgjitë me pagesë në vilën Arcore, prone e Berlusconit në zonën e Brianzas në Lombardi.
(tesheshi.com)
