Ministri i Punëve të Jashtme të Argjentinës, Hector Timerman, dhe kryeministri britanik, David Cameron, replikuan ashpër mbi ishujt Malvine/Falkland ditën e djeshme në një takim në Bruksel që mbledh përfaqësues të lartë nga 61 vende të BE-së dhe CELAC-it, Komunitetit të Shteteve Amerikanolatine.
Fillimisht në konferencë e mori fjalën Timerman-i, i cili tha mes të tjerash se, “Qeveria e Argjentinës pret që vendet e Bashkimit Europian të mbështesin rezolutën e Kombeve të Bashkuara që i nxit Argjentinën dhe Mbretërinë e Bashkuar të dialogojnë mbi ishujt Malvine.”
Ai vazhdoi të fliste, duke e rritur tonin, “Zhvatja e burimeve natyrore që i përkasin popullit argjentinas është tërësisht e paligjshme. Zgjidhja paqësore e konflikteve kërkon që ne të respektojmë integritetin territorial të shteteve.”
“Mbretëria e Bashkuar i përzuri 182 vite më parë popullsinë dhe autoritetet argjentinase nga ishujt Malvine, duke shkelur integritetin territorial të vendit tim,” tha ministri argjentinas i Punëve të Jashtme në fjalën e tij.
“Kolonializmi ende vazhdon, duke u mbështetur në logjikën e përvetësimit të burimeve natyrore. Atlantiku i Jugut ka dëshmuar muajt e fundit shfrytëzimin e hidrokarbureve në afërsi të ishujve Malvine”, shtoi ai.
David Cameron, që e kishte mbajtur fjalën e tij më herët në konferencë, kërkoi t’u përgjigjej komenteve të Timerman-it. “Falklandët kanë të drejtën për vetëvendosje, dhe ujërat përreth janë nën juridiksionin e tyre,” u shpreh kryeministri britanik. “Unë i hedh poshtë fjalët kërcënuese të ministrit të Jashtëm argjentinas,” tha ai më tutje.
Argjentina dhe Britania e Madhe përplasen në çdo rast në lidhje me pronësinë mbi ishujt Malvine. Argjentina pretendon se i trashëgoi ishujt nga Spanja kur fitoi pavarësinë. Nga ana tjetër, Britania deklaron se i ka qeverisur historikisht ato, e se ishullorët duket të kenë të drejtën për vetëvendosje.
Konflikti i armatosur mes dy vendeve në vitin 1982 u mori jetën 649 argjentinasve dhe 255 britanikëve.
/tesheshi.com/
