Për herë të parë në historinë mbi 20-vjeçare të politikës shqiptare, një aktor humori bëhet objekt i ligjërimit të tensionuar politik. Fjala është për Bes Kallakun, aktorin e njohur të spektaklit të humorit ‘Portokalli’, i njohur ndryshe me pseudonimin “Gjini”. Një ditë më parë, Gjini u shfaq me një video ku hiqej si vrasës me pagesë, por që mbas pendimit rrëfente gjithë sagën e planifikimit të vrasjeve në politikën shqiptare.
Orë më vonë, ai u shfaq dhe në automjetin e deputetit të LSI-së Spartak Braho, teksa ky i fundit shkoi të dëshmonte në Prokurori. Por për Partinë Demokratike, ky nuk është humor, por një skemë presioni ndaj organit të akuzës. Kjo, u artikulua në një konferencë për shtyp nga ana e sekretarit të përgjithshëm të PD-së Arben Ristani, kur tha se:
“Edi Rama dhe Ilir Meta kordinuan dje një sulm të ri ndaj Prokurorisë, në përpjekje për të mbyllur hetimin dhe fshehur të vërtetën, për akuzën e porositjes së vrasjes së dy deputetëve, duke keqpërdorur një aktor të “Portokallisë” për çështjen më serioze dhe më të mprehtë të politikës dhe shtetit, në 25 vitet e fundit. Ky presion ndaj drejtësisë për të mbyllur hetimin dhe fshehur të vërtetën, u vu në jetë fillimisht nga Edi Rama, i cili publikoi në Facebook një video të Bes Kallakut, që përqesh e bën pazar me jetën e deputetëve”, tha deputeti demokrat Arben Ristani. /tesheshi.com/
