Projektligji i partisë Demokratike për dekriminalizimin parashikon themelimin e një institucioni për verifikimin e figurave që zgjidhen në poste publike si dhe një strukture të posaçme brenda prokurorisë së Përgjithshme po për këtë qëllim.
Oerd Bylykbashi publikoi draftin e opozitës, dy ditë pasi qeveria miratoi një version të saj për ligjin e dekriminalizimit e kur kryeministri Rama tha se varianti i PD-së përmban “shpikje” të papranueshme për mazhorancën.
“Organi kompetent për miratimin e akteve që do të vihen në zbatim të ligjit do të jetë Kuvendi për t’i dhënë kontrollin e plotë politik Kuvendit në gjithë këtë nismë, në mënyrë që askush të mos devijojë nga qëllimet e ligjit”, theksoi Bylykbashi në sqarim të draftit.
Në ndryshim nga drafti i qeverisë, varianti i opozitës parashikon që verifikimi të jetë në dorë të një institucioni të posacëm.
“Qeveria ka parashikuar që verifikimin ta bëjë vetë. Ndërkohë që ne kemi parashikuar një nismë që është komplet jashtë kontrollit të personave që mund të kenë konflikt interesi”, tha Bylykbashi.
Sipas draftit të opozitës, ka disa kategori shtetasish që mund të kërkojnë verifikimin e një funksionari publik.
Në projektligjin e qeverisë është parashikuar që verifikimi të bëhet nga vetëdeklarimi i personit, e më pas verifikimi nga institucioni ku do të punojë.
Ndryshim në variantet e palëve është se në draftin e PD-së kërkohet verifikim edhe për personat që kanë ndërruar identitet, pikë kjo e panegociueshme.
“Është rasti i deputeti Frroku që rezulton me 8 emra. Këta persona nuk do të kenë mundësinë të kandidojnë dhe instrumenti më i mirë për këtë janë të dhënat biometrike, gjurmët e gishtërinjve. Të gjithë e dimë, që me gjurmët e gishtërinjve, çfarëdo emri të ketë është po i njëjti dhe nuk i shpëton ligjit. Dhe ky element është hequr nga qeveria”, sqaroi Bylykbashi. /tesheshi.com/
