Ministri i Jashtëm Ditmir Bushati është takuar me sekretarin e përgjithshmë të OSBE-së, Lamberto Zannier. Ai ndodhet në vendin tonë në kuadër të samitit të presidentëve, SEECP.
Bushati dhe Zannier i cilësuan ngjarjet e Kumanovës, si shfaqje e krizës së demokracisë në vend, “dhe jo konflikt ndëretnik, siç ka pasur përpjekje për ta etiketuar atë”.
“Zbatimi i Marrëveshjes së Ohrit në mënyrë të plotë dhe të pakushtëzuar është thelbësor për zgjidhjen e çështjeve që e mbajnë peng Maqedoninë drejt integrimit të plotë Euro-Atlantik”, janë shprehur të dy bashkëbiseduesit.
Kryesia serbe e radhës e OSBE-së dhe roli i saj në rajon ishte një tjetër çështje bisedimi mes Ministrit Bushati dhe Sekretarit të Përgjithshëm të OSBE-së, parë edhe nën dritën e përpjekjeve integruese të vendeve të rajonit dhe bashkëpunimit në kuadër të Procesit të Berlinit.
