Ministri i Jashtëm shqiptar Ditmir Bushati kërkoi sot në Ohër nga kreu i BDI-së që në kuadër të zgjidhjes së krizës politike në Maqedoni të ketë në fokus dhe agjendë të veçantë çështjen që kanë të bëjnë me shqiptarët, gjegjësisht siç nënvizohet Marrëveshjen e Ohrit.
Siç bën të ditur MPJ, Ahmeti ka informuar Bushatin për rrjedhën e procesit të negociatave në Shkup dhe Bruksel dhe dështimin e tyre pa asnjë marrëveshje konkrete.
Tirana zyrtare ka bërë thirrje në implementimin e plotë të Marrëveshjes së Ohrit. Nga ana tjetër, BDI përmes një komunikate ka informuar mbi takimin, ku theksohet se BDI ka luajtur rol konstruktiv dhe të rëndësishëm në vendosjen e dialogut politik me ndërmjetësim ndërkombëtar dhe do të vazhdon me kontributin e njejtë në bashkëbisedim me të gjitha palët.
“Marrëveshja e dy qershorit është e mirë jo vetëm se i referohet themeleve të stabilitetit si marrëdhëniet ndëretnike, marrëveshjen e Ohrit, marrëdhëniet ndërfqinjësore dhe integrimin EuroAtlantik, por edhe sepse paracakton reforma të rëndësishme dhe të patjetërsueshme që duhet t’i ndërmarrim në afat sa më të shkurtër, andaj edhe palët nuk duhet që të ngrejnë dorë, por t’i tejkalojnë interesat partiak dhe të mendojnë për vendin dhe qytetarët” ka theksuar Ahmeti. /tesheshi.com/
