Shefi i diplomacisë shqiptare i ka kërkuar Shkupit të mos i përdorë shqiptarët si “mish për top”. Shqipëria dënon aktet e dhunës në Maqedoni dhe kërkon vetëpërmbajtje, por njëkohësisht vlerëson edhe si të papranueshme që një grup personash të armatosur identifikohen etnikisht. Në një dalje para gazetarëve, ministri i Punëve të Jashtme Ditmir Bushati kërkoi që të shmanget gjuha e urrejtjes dhe palët të punojnë sipas frymës së Marrëveshjes së Ohrit, si e vetmja rrugë për integrimin e Maqedonisë.
“Konsiderojmë të papranueshëm fakin që një grup personash të identifikohen etnikisht dhe që vrasja e efektivëve të policisë të përdoret etnikisht. Bëjmë thirrje për vetëpërmbajtje. Gjuha e urrejtjes dhe veprimet ekstreme duhet t’i lënë vend angazhimti ndaj të drejtave themelore. Harmonia e marrëdhënieve ndëretnike sipas Marrëveshjes së Ohrit, është thelbësore dhe busull për rrugën integruese të Maqedonisë”- deklaroi Bushati. Në një deklaratë për mediat, në orët e pasdites, Ministria e Brendshme e Maqedonisë bëri të ditur se aksioni në Kumanovë u ndërmor për të kapur një grup të armatosur, që sipas autoriteteve maqedonase kishte planifikuar të bënte sulme terroriste ndaj institucioneve shtetërore.
Informacionet ishin marrë fillimisht në rrugë operative, thotë Ministria maqedonase, por më vonë u zbulua sipas tyre se grupi i armatosur kishte hyrë ilegalisht në Maqedoni nga një vend fqinj, pa e specifikuar për cilin shtet bëhet fjalë, dhe se më tej u strehuan nga mbështetës të tyre për të përgatirur për sulmet e planifikuara terroriste. Vlen të theksohet se vendi më i afërt në kufi me Kumanovën është Lugina e Preshevës. Në deklaratën e Ministrisë së Brendshme të Maqedonisë theksohet se aksioni nisi në Kumanovë pasi u zbulua vendndodhja e tyre aktuale. Po sipas kësaj deklarate, grupi i terroristëve është i armatosur rëndë dhe është i trajnuar për luftëra.
