Drejtoria e Përgjithshme e Burgjeve i kërkon pushtetit vendor të krijojë hapësirat për punësimin e personave të dënuar, të cilët zotërojnë një profesion.
Propozimi synon uljen e kostos për një të dënuar, për të cilin buxheti i shtetit shpenzon 350-550 euro.
Burgjet pretendojnë se me aplikimin e formulës së punësimit, kjo kosto reduktohet në 50%.
Shkresa i është drejtuar kryebashkiakëve, të cilëve u kërkohet që ndërmjet tyre dhe Drejtorisë së Përgjithshme të Burgjeve të nënshkruhet një memorandum për të përcaktuar kushtet e punësimit të personave të privuar nga liria.
Sipas kësaj shkrese, të bërë publike nga Report Tv, një pjesë e konsiderueshme e të dënuarve gëzojnë aftësi profesionale në punë me dru, hidraulike dhe elektriçist.
Aktualisht në rang vendi janë një numër i kufizuar personash që janë të punësuar pranë pushtetit local, por kjo ka ndodhur pasi ata kanë fituar lirin me kusht. Ndërsa të dënuar që janë të punësuar ende nuk ka.
Pak javë më parë ky projekt u vu në jetë me bashkinë e Tiranës, e cila për rikonstruksionin e kopshtit numër 8 në Tiranë punësoi disa të dënuar. /tesheshi.com/
