Paketa e re e shpëtimit të Greqisë ka marrë dritën jeshile në dhomën e ulët të parlamentit gjerman, Bundestag që votoi me 454 vota pro, 113 kundër e 18 abstenime. Kështu hapet rruga që Greqia të marrë paratë e domosdoshme për të kryer pagesën ndaj Bankës Qendrore Europiane më 20 gusht dhe për të larguar hijen e falimentit që e përndjek prej vitesh tashmë.
Por, ndërkohë kancelarja gjermane nuk e ka pasur të lehtë të kalojë sprovën në Bundestag për shkak se edhe brenda radhëve të partisë së saj, ka pasur zëra kundërshtues. Sipas medias gjermane, ka pasur vota kundër edhe mes deputetëve të partisë së Merkel, edhe pse paketa prej 86 miliardë euro ka kaluar lehtësisht.
56 nga 311 deputetë konservatorë u shprehën kundër ndihmës për Greqinë, ndërsa 4 ligjvënës abstenuan.
Në argumentet e paraqitura, në mbështetje të apelit të tyre për një votë “Po”, Kancelarja dhe ministri i saj i Financave, Wolfgang Schäuble, kanë siguruar deputetët se Fondi Monetar Ndërkombëtar do të marrë pjesë në dorëzaninë e tretë për Athinën.
Përfshirja e FMN-së shihet e domosdoshme për të garantuar zbatimin e reformave të premtuara nga Athina. /tesheshi.com/
