Vizita e zv presidentit amerikan Mike Pence në Evropë, “dëshmon” se SHBA po planifikon një “ofensivë” kundër qëllimeve të Rusisë “që të minojë integritetin dhe sovranitetin e çdo vendi evropian.”
Ky është vlerësimi i analistit amerikan Janusz Bugajski.
“Pence nuk vizitoi rastësisht tre vendet kryesore e rajonit, në të cilat marrëdhëniet Shteteve të Bashkuara dhe Rusisë janë veçanërisht të tensionuara: Estoninë, e cila është kyçe në rajonin e Balltikut, Gjeorgjinë, e cila është kyçe për Kaukazin, dhe Malin e Zi, i cili është shumë i rëndësishëm në Ballkan. Deklaratat e tij dëshmojnë se Uashingtoni planifikon të përgjigjet me një ofensivë vendimtare kundër qëllimeve të Putinit për të minuar sovranitetin dhe integritetin e çdo vendi evropian”, tha Bugajski.
Ai shpjegoi se tani të gjithë sytë janë të drejtuar nga administrata e Trump, e cila duhet të zhvillojë iniciativa për të konsoliduar sigurinë në vendet që janë më të ekspozuar ndaj veprimeve subverzive të Rusisë.
Pence vizitoi javën e kaluar Estoninë, Gjeorgjinë dhe Malin e Zi, ku tha se Rusia po ndërhyn në punët e brendshme të disa vendeve dhe dënoi një sjellje të tillë.
Zv. presidenti amerikan akuzoi Rusinë se po përpiqet që të “ndajë rajonin” me qëllim që të “minojë” proceset e integrimit rajonal dhe se po përpiqet të “vizatojë kufijtë e ri me forcë”.
“Shtetet e Bashkuara kanë hedhur poshtë çdo përpjekje për përdorim të forcës dhe çfarëdo kërcënimi në rajon dhe më gjerë. Ballkani Perëndimor ka të drejtë që në mënyrë të pavarur të vendosë për të ardhmen e vet”, ishte mesazhi i zv presidentit të SHBA.
Në të njëjtën ditë kur Pence në Podgoricë kritikoi politikën e Kremlinit ndaj rajonit, presidenti amerikan Donald Trump nënshkroi një ligj në Ëashington më të cilin SHBA ashpërson sanksionet kundër Rusisë. /tesheshi.com/
