Brukseli zyrtar e ka pranuar ftesën e Prokurorit Publik të Maqedonisë për dërgimin e vëzhguesve ndërkombëtarë për rastin gjyqësor “Grushtet”, në të cilin i akuzuar për bashkëpunim me shërbimet e huaja sekrete, është edhe lideri i LSDM-së opozitare, Zoran Zaev.
Këtë e konfirmoi zëdhënësja e Komisionit, Maja Koçijançiç, mirëpo në bazë të të dhënave të marra nga prokuroria në Shkup, i bie që ekspertët ligjorë ndërkombëtarë do të vijnë në kryeqytetin maqedon me epitetin “mysafir nderi” pasi nuk do të kenë kompetenca për thellime në rrjedhën e hetimeve.
“Ekspertët do të jenë në rrjedhë me punën, por vetëm për t`u siguruar objektiviteti dhe paanshmëria si dhe zbatimi i standardeve”, thonë nga Prokuroria Publike.
Ndërkohë, grupet politike në Parlamentin Evropian, deri në fund të këtij muaji, do të formojnë një grup i cili ka për qëllim të vijë në Maqedoni dhe të përpiqet t’i pajtojë partitë më të mëdha politike në vend.
“Komisioni e ka kuptuar se takimi i parë i grupit punues të Europarlamentit duhet të mbahet me përfaqësues të partive nga fundi i muajit dhe Komisioni do të punojë në bashkëpunim të ngushtë me anëtarët e Parlamentit Evropian në këtë pikëpamje”-tha Koçijançiç. /tesheshi.com/
