Raportuesi i Shqipërisë në Parlamentin Europian, Knut Fleckenstein, ka lënë pas gjuhën e përpunuar diplomatike duke folur troç. Gjatë në një konferencë për shtyp pas dy ditë qëndrimi në Tiranë, diplomati europian ka vendosur që t’i bëjë apel opozitës, por nominalisht ish-kreut të saj, Sali Berisha, që mos merren me Sorosin, ku deklarimet me emrin e tij i ka quajtur përralla.
“Kam shumë respekt për Berishën, ndoshta më shumë sesa mendoni ju dhe këtë e kam me të vërtetë. Por ama do të doja që t’i kërkoja të mos fliste më për këto përrallat sorosiane, e njëjta histori që kam dëgjuar edhe në Maqedoni. Zoti Berisha nuk është i dobët”, tha ai.
Më pas, ai u pozicionua haptazi, jo vetëm në emrin e tij por dhe të kolegëve të tjerë, krerë të Brukselit, kundër protestës së opozitës, duke i bërë thirrje që të kthehet në parlament.
“Unë nuk do ndërhyj e as komentoj protestën pasi është çështje e brendshme, është e drejtë e qytetarëve dhe e opozitës të protestojë. Por, bojkoti i Kuvendit është jo mënyrë e duhur sidomos për zgjedhësit që kanë votuar për ata deputetë, unë u kërkoj kolegëve të mi në PD të vazhdojnë atë që ata mendojnë se është e nevojshme, por u kërkoj të kthehen në punë, e ky nuk është vetëm mendimi im, por edhe i Kukan, Hahn, Mogerinit, e Vlahutinit pra i të gjithëvene”, theksoi Fleckenstein, i cili më pas shtoi më pas dhe diçka për vettingun në adresë të opozitës.
“U them kolegëve të PD mos na e jepni ndjesinë që e keni keqpërdorur punën dhe besimin tonë, ndarjen 50% me 50% për reformën. Minimalja është të shkoni në punën e komisioneve, mos ndaloni procesin e vetingut dhe reformën në drejtësi”.
Sakaq, kundër protestës së opozitës është shprehur dhe komisioneri Hahn.
“Shpreh keqardhjen për bojkotin parlamentar të opozitës. Debati politik duhet të ndodhë brenda dhe jo jashtë Parlamentit. Bashkëpunimi mes qeverisë dhe opozitës është i domosdoshëm për ambicien e vendit për t’iu bashkuar Bashkimit Europian”, shprehet Hahn. /tesheshi.com/
