Liderët e eurozonës kanë arritur marrëveshje pas bisedimeve maratonë në lidhje me paketën e tretë të ndihmës financiare për Greqinë. Rezultati i bisedimeve maratonë prej 16 orësh të liderëve të eurozonës është bërë i ditur nga kreu i BE-së, Donald Tusk.
Ai shkroi në Twitter se program i ndihmës ishte gati për Greqinë, duke shtuar “me reforma serioze dhe mbështetje financiare”.
Shefi i eurogrupit, Dijsselbloem shpjegoi përpara gazetarëve se marrëveshja është bazuar tek besimi, tek reformat, e nevojat e borxhit financiar. “Ne arritëm të merremi vesh për të gjitha këto që Greqia të kthehet në rrugën e duhur”, tha ai.
Sipas marrëveshjes, parlamenti grek duhet të nxjerrë sa më shpejt ligje të reja për një numër temash, që do të mundësojnë rikthimin e besimit tek shtetet anëtare. Reformat në Greqi duhet gjithashtu të përforcohen me shpejtësi.
Marrëveshja përmban ngritjen e një fondi ku do të transferohen asete të Greqisë. Fondi do të mbushet me para nga privatizimi ose funksionalizimi i tyre, para që do të përdoren për rikapitalizimin e bankave.
Pasi të paguhen 25 miliardë euro për rikapitalizimin, fondi i mbetur do të përdoret për të ulur borxhin në masën 50 për qind ndërsa gjysma tjetër do të përdoret nga qeveria greke për ta riinvestuar në Greqi.
Në mënyrë që të nisin negociatat formale për paketën, parlamenti grek duhet të miratojë sot marrëveshjen dhe të njëjtën gjë duhet ta bëjnë edhe gjashtë parlamente të vendeve të BE-së.
Kancelarja gjermane, Angela Merkel doli gjithashtu përpara shtypit, për të dhënë reagimin e saj ndaj marrëveshjes. “Kemi thënë gjithnjë se bëhet fjalë për një program trevjecar, kompletimin e reformës së pensioneve, privatizimet dhe rregullim të tregut të punës”, tha kancelarja për thelbin e marrëveshjes. Në lidhje me fondin prej 50 miliardë euro për privatizimet ajo theksoi se ai do të përdoret për rikapitalizimin e bankave që më pas do të privatizohen. Fondi do të drejtohet me mbikqyrje europiane.
“Dëshirojmë mundësitë më të mira për privatizimin dhe të marrim të ardhurat më të mira të mundshme nga asetet. Kemi nevojë të mbështesim programin, pasi kemi parë në të kaluarën problem me zbatimin e programeve të ndihmës”, tha Merkel.
Në lidhje me kushtet e ndihmës, që kanë shkaktuar shumë debate në Greqi dhe në eurozonë, Merkel konfirmoi se do të jenë të njëjta me ato që janë zbatuar në vende të tjera më parë. Sipas saj, lehtësimi i borxhit është jashtë diskutimi.
Kryeministri grek, Aleksis Cipras u tha gazetarëve në reagimin e parë pas marrëveshjes, se pala greke përballoi një betejë të vështirë, me vendime të vështira.
“Morëm përgjegjësinë për vendime që shmangën planet më ekstreme të qarqeve konservatore në Europë. Menaxhuam ristrukturim të borxhit dhe financim afatmesëm. Greqia do të vijojë betejën për të qënë në gjendje të rimëkëmbet”, tha ai.
“Nuk ka fitues apo të humbur. Nuk mendoj se populli grek është poshtëruar apo vendet e tjera europiane”, tha ndërkaq, kreu i Komisionit Europian, Juncker.
Lajmin e kanë bërë të ditur fillimisht përmes rrjeteve sociale, kryeministri belg, Charles Michel dhe më pas edhe një zëdhënës i Qeverisë qipriote. Nikos Christodoulides shkroi në Twitter: “Duket se kemi një marrëveshje.”
Detajet e marrëveshjes ende nuk janë të qarta.
/tesheshi/
