Libia, në qendër të vëmendjes për shkak të trazirave të brendshme të krijuara nga grupet ndërluftuese, është kthyer në një vend pritës e përcjellës për të pashpresët afrikanë që kërkojnë të largohen drejt Europës.
Brigjet e Libisë janë vetëm 300 kilometra larg ishullit më jugor të Italisë, Lampeduzës, që tani pret me mijëra emigrantë ilegalë. Mbartja ilegale e emigrantëve që lënë Libinë ka çuar vetëm gjatë shtatë ditëve të fundit në humbjen e më tepër se 1.600 jetëve. Shifrat e humbjeve në njerëz mund të tejkalojnë çdo parashikim ndërsa më shumë se një milionë persona janë në pritje për të arritur në brigjet europiane nëpërmjet Libisë.
Gjatë sundimit të Gadafit, autoritetet libiane nuk ishin në gjendje t’i kontrollonin tërësisht kufijtë e tyre, dhe qindra njerëz i kalonin për çdo ditë ato përmes Sudanit, Nigerit dhe Çadit. Gadafi e pati përdorur emigracionin si formë presioni ndaj Europës, duke i hapur dhe i mbyllur dyert për emigrantët në varësi të marrëdhënieve me vendet e BE-së.
Vala e emigrantëve ilegalë nga Libia u ndërpre gjatë viteve 2008-2011 pas nënshkrimit të një marrëveshjeje me Romën. Por, me rënien e Gadafit, e me kaosin aktual, Libia u kthye përsëri në qendër të kontrabandistëve që veprojnë pa u ndëshkuar.
Situata e paqëndrueshme në rajon i ka bërë shumë njerëz të kërkojnë t’u ikin konflikteve, në përpjekje për të gjetur strehë e siguri në vendet europiane. Në vitin 2014 arritën në Europë nëpërmjet Detit Mesdhe mbi 218.000 emigrantë. Më shumë se 110.000 të tillë kaluan nëpërmjet territorit libian vetëm vitin e shkuar, sipas shifrave të OKB-së. Ky numër vijon të rritet, ndërsa mijëra emigrantë i kanë sytë nga brigjet e Italisë, Maltës, Spanjës, Greqisë e Qipros. Mbi 35.000 emigrantë kanë arritur në Europën jugore që nga fillimi i vitit, e ndërkaq dyndja nuk duket të ketë të ndalur./tesheshi.com/
