Gjërat janë bërë më të komplikuara për Brazilin pas ndeshjes me Kolumbinë në Kupa Amerika. Disfata e pësuar nuk ishte e vetmja goditje që morrën brazilianët. Ata tani kompeticionin do ta vazhdojnë pa yllin kryesor Neymar i cili u ndëshkua me karton të kuq për goditjen me kokë ndaj Murillos. Ishte, pikërisht “viktima” Murillo i cili në fund u shndërrua në “hero” për kombëtaren Kolumbiane që merr triumfin e parë vetëm pas ndeshjes së dytë.
Një ndeshje kjo që u njollos në fund ku protagonistë negativë u bënë Neymar dhe Bacca, të cilët u përjashtuan nga gjyqtari me karton të kuq. Ndeshja u karakterizua nga loja e ashpër që u pasqyrua edhe në numrin e pakët të rasteve nga të dyja krahët.
Pas vërshëllimës finale, Neymar goditi me një top Zapatan dhe ky gjest ngjalli reagimin e lojtarëve kolumbianë me sulmuesin Bacca që shtyu kundërshtarin në mënyrë të dhunshme. Kjo është humbja e parë e Brazilit të Dungës në 12 ndeshjet e fundit, por më shumë se statistikat, disfata është shqetësuese sepse në ndeshjen e fundit, Brazili duhet të luajë një ndeshje direkte për kualifikimin e mëtejshëm kundër Venezuelës. /tesheshi.com/
