Biletat për ndeshjet e Argjentinës në grupe të Kupës së Botës në Katar kundër Meksikës dhe Arabisë Saudite ishin “më të kërkuarat” në tre muajt përpara Kupës së Botës, e cila do të zhvillohet nga 20 nëntori deri më 18 dhjetor, raporton AFP.
Drejtori i turneut Nasser Al-Khater i tha agjencisë kombëtare të lajmeve të Katarit QNA se ndeshja e 26 nëntorit Meksikë-Argjentinë në stadiumin Lusail ishte “më e kërkuara”, e ndjekur nga ndeshja Arabi Saudite-Argjentinë.
Gjithsej 2.45 milionë bileta janë shitur për Kupën e parë Botërore që do të mbahet në Lindjen e Mesme dhe botën arabe, njoftoi FIFA javën e kaluar.
Një e treta e biletave, për sponsorët dhe partnerët
Vendi pritës, i ndjekur nga SHBA, Anglia, Arabia Saudite, Meksika, Emiratet e Bashkuara Arabe, Franca, Argjentina, Brazili dhe Gjermania kryesojnë në shitjet e biletave, sipas të dhënave të FIFA-s.
Numri i biletave të disponueshme është 3.2 milionë, nga të cilat një e treta është e rezervuar për sponsorë dhe partnerë, kujtoi Al-Khater.
FIFA nuk ka shpallur ende datat për fazën e “minutit të fundit” të shitjes së biletave në fund të shtatorit. /tesheshi.com/
