Fuqia e Vladimir Putin varet drejtpërdrejt nga rezultati i luftës në Ukrainë, vlerësoi ndër të tjera Henry Kissinger në një intervistë të tij të fundit.
Tashmë 100-vjeçari, ish-Sekretari amerikan i Shtetit dhe “magjistari i diplomacisë”, duke folur për Bloomberg iu referua liderëve të kohës sonë. “Ata nuk e kanë përvojën e fatkeqësisë dhe mendojnë se kanë më shumë opsione sesa mendojnë se kanë”, theksoi ai.
Për sa i përket mbijetesës së Vladimir Putinit në pushtet, ai e vlerësoi atë si “të pamundur” nëse lufta në Ukrainë e detyron Rusinë të braktisë agresionin dhe të pranojë një marrëveshje paqeje me Evropën.
Ukraina duhet të dalë nga konflikti si një demokraci e fortë, shpjegon ai. Ai shton se është më mirë të shmanget kolapsi i Rusisë dhe të mos rrëshqitet në një përzierje dobësie dhe hidhërimi.
Kissinger dëshiron që Rusia të pranojë se marrëdhëniet e saj me Evropën bazohen në një marrëveshje (reciproke). “Unë besoj se lufta, nëse përfundon siç duhet, do ta bëjë të mundur,” thotë ai.
Ai madje e cilësoi presidentin e Rusisë si një “figurë nga Dostojevski” me ambivalencë dhe ambicie të paplotësuara. Ai nuk është i përkushtuar ndaj pushtetit në kuptimin abstrakt, por është jashtëzakonisht i zoti në përdorimin e kësaj fuqie.
Çfarë sheh ai për Gjermaninë, Britaninë dhe Tajvanin?
Qendra politike e gravitetit të Evropës “po lëviz në mënyrë të pashmangshme drejt Gjermanisë”, tha Kissinger, duke shtuar se Berlinit iu paraqit një sfidë e re se si ta ushtrojë atë pushtet.
Për Britaninë ai tha se është psikologjikisht në një pozicion më të mirë për të forcuar lidhjet me amerikanët sesa një vend si Franca që mbetet brenda Bashkimit Evropian. Tani ekziston një mundësi e madhe për Britaninë “që të veprojë si një lidhje midis Evropës së bashkuar dhe Amerikës”, shtoi ai.
Paralajmërimi më i zëshëm i Kissingerit kishte të bënte me perspektivën e një lufte midis SHBA-së dhe Kinës për Tajvanin. “Me kursin aktual të marrëdhënieve, mendoj se një konflikt ushtarak është i mundur,” tha ai, duke nënvizuar se “kursi aktual i marrëdhënieve duhet të ndryshojë”. /tesheshi.com/
