Dje bursat më të mëdha europiane shënuan rënia si pasojë e ndikimit nga paralajmërimet e lëshuara nga autoritetet greke se thesari do të boshatiset brenda dy javësh pas shlyerjes së këstit të kredisë për FMN-në. Kjo e riktheu edhe një herë frikën se Athina e mbingarkuar nga kriza e borxheve do të dalë nga eurozona.
Indekset e Financial Times Britanike ranë me 1,69% në tregtinë e pasdites, ashtu siç indeksi gjerman DAX 30 ra me 1,82%, ndërsa indeksi Francez CAC 40 humbi me 1.14% të vlerës së saj në krahasim me nivelin në të cilin ajo u mbyll të hënën.
Marks Heberi një ndër analistët e mëdhenj të firmës Bergeren and Black një kompani financiare brokerimi, shpjegoi se rënia e çmimeve të aksioneve evropiane vjen pas përkeqësimit të krizës financiare greke dhe se ky është faktori më shqetësues për investitorët.
Masa të jashtëzakonshme
Autoritetet greke u detyruan sot që të përdorin masa të jashtëzakonshme si përshembull përdorimin e fondeve të jashtëzakonshme në mënyrë që të paguanin këstin prej 750 miljonë eurosh që i përkisnin FMN-së, çka i shtoi edhe më tej presionet mbi përpjekjet e saj për të arrirë në një marrëveshje me palët kreditore në mënyrë që të shmaget falimendimi dhe dalja e saj nga eurozona.
Një burim nga Banka Qendrore Greke tha se Fondi i përmendur më lartë ishte për “nevoja të jashtëzakonshme”, duke shtuar se kjo ishte iniciativë e Guvernatorit të Bankës Qendrore për të dalë nga kriza.
Megjithatë, Athina ende përballet me detyrime të mëdha të jashtme, pasi ajo duhet të bëjë pagesën e miliardave dollarë në tre muajt e ardhshëm. Ministri grek i financave, Janis Varofakis, paralajmëroi në përfundim të takimit të ministrave të financave të eurozonës ditën e djeshme se “çështja e likuiditetit është çështja më urgjente për Greqinë” , pasi ajo ka frikë se mos rrëshqet drejt falimentimit brenda disa javësh nëse nuk arrihet në një marrëveshje me kreditorët e saj për lëvrimin e një pjese të fondeve shpëtimit.
Greqia ende vazhdon negociatat maratonike me Bashkimin Evropian, Bankën Qendrore Evropiane dhe Fondin Monetar Ndërkombëtar, një përpjekje kjo për të përfituar një tjetër paketë shpëtimi me vlerë 7.2 miliardë euro.
Associated Press
