Sulmi misterioz ndaj autokolonës së ndihmave të OKB-së pranë Aleppos ka ndezur polemika të reja në lidhje me zhvillimin e konfliktit në Siri. Edhe pse është lënë të kuptohet se sulmi ka për autor rusët, vetëm së fundmi, kanë dalë deklarata të qarta që vendosin gishtin mbi Moskën. Kështu, sekretari i Jashtëm britanik, Boris Johnson deklaroi se ka prova të forta që Rusia ka ndërmarrë sulmin ajror të së hënës që shkatërroi një autokolonë ndihmash të Kombeve të Bashkuara në Siri.
Johnson e bëri këtë koment jashtë sallës ku mbahej takimi i këshillit të sigurimit të OKB-së, edhe ai i tepër i tensionuar. Takimi u thirr pas sulmit mbi autokolonën në perëndim të Alepps. Shtetet e Bashkuara dhe Rusia shkëmbyen akuza për përgjegjësinë për sulmin, nga i cili u vranë të paktën 20 persona dhe fajësuan njëra-tjetrën për thyerjen e armëpushimit njëjavor në këtë vend.
Zyrtarët e mbrojtjes amerikane kanë thënë se kishin prova të qartë se sulmet mbi autokolonën ishin kryer nga avionë rusë, por Johson është zyrtari i parë që e deklaron akuzën publikisht.
Ai u tha gazetarëve: “Eshtë shumë herët për të thënë ndonjë gjë nëse bëhet fjalë për një akt kriminal apo për të dhënë gjykime përfundimtare për përgjegjësinë, por le ta vendosim në këtë mënyrë: kur shikon se çfarë ndodhi me autokolonën e ndihmave, ka vetëm dy keqbërës të mundshëm- vetëm dy forca të afta të ndërmarrin sulme, e që fluturojnë në atë zonë. Ata janë sirianët dhe rusët dhe ne kemi dyshimet tona për aftësinë e sirianëve për të fluturuar gjatë natës. Kështu që kemi mbetur me një konkluzion goxha të fortë”.
Ministri i Jashtëm rus, Sergey Lavrov, u tha homologëve që merrnin pjesë në takim se Rusia kishte ndërmarrë disa fluturime për mbikqyrjen nga ajri të autokolonës së ndihmave për Aleppon, dhe ka pranuar përpara tyre se forca ajrore siriane nuk e ka aftësinë teknike për të ndërmarrë fluturime të tilla gjatë natës.
Zyrtarët perëndimorë thanë se fakti që sulmet ajrore goditën të njëjtën shënjestër në mënyrë të përsëritur përgjatë periudhave të vogla kohore, gjithashtu e drejton përgjegjësinë tek rusët, pasi vetëm forca ajrore ruse ka avionë më të sofistikuar për të shënjestruar qartë.
Duke folur më herët në këshillin e sigurimit, Lavrov tha se Rusia do të mirëpriste një hetim për bombardimin e autokolonës dhe apeloi ministrat të mos reagonin emocionalisht. Ai tha se armëpushimi ishte shkelur me qindra herë nga kryengritësit.
Diplomatë perëndimorë thanë se mbetet e paqartë se çfarë lloj hetimi do të mbështeste Moska. Në vërejtjet e veta në këshillin e sigurimit, sekretari amerikan i Shtetit, John Kerry hodhi poshtë rrëfimin e Lavrov për shkatërrimin e marrëveshjes së armëpushimit.
“Duke dëgjuar kolegët e mi nga Rusia, u ndjeva sikur isha në një univers paralel”, tha Kerry. Shkalla e masakrave të kryera nga qeveria siriane, tha ai, do të thotë se “nuk mund të vazhdojmë punën si zakonisht. Ne nuk mund të dalim nga kjo dhomë dhe të themi se do mbështesim një armëpushim që të gjithë e dinë se nuk do të funksionojë”.
“A jemi të detyruar të ulemi në tryezë dhe të zhvillojmë një bisedë të gëzuar me një qeveri që bën gjëra të tilla”, pyeti ai.
Kerry tha se e vetmja mënyrë për besueshmërinë që armëpushimi të rikthehet është që të gjithë avionët sirianë të ndalen së fluturuari mbi zonat ku shpërndahen ndihma humanitare.
Përgatiti: Juli Prifti – /tesheshi.com/
