Pas zgjedhjes president të Hashim Thaçit, një seri goditjesh me bomba Molotov dhe me mjete zjarrvënëse kanë shkatëruar selitë e dy partive kryesore në Kosovë: të LDK-së dhe PDK-së.
Selitë e Lidhjes Demokratike të Kosovës, ajo qendrore në Prishtinë dhe e degëve në Kodrën e Trimave në këtë qytet, si dhe në Gjakovë e Istog, janë sulmuar e shkatërruar të shtunën në mbrëmje nga persona të maskuar e të tjerë, ende të paidentifikuar, njofton kjo forcë politike.
“Lidhja Demokratike e Kosovës dënon ashpër sulmet vandale mbi selinë qendrore të LDK-së në Prishtinë, mbi zyrat e LDK-së në Gjakovë, Istog dhe në Kodër të Trimave, të kryera gjatë natës së sotme nga persona ende të panjohur për organet e rendit”, theksohej në njoftimin e dërguar para mesnatës.
Ndërkaq, një zëdhënës policie njofton për shkatërrimet në degët e PDK-së. “Mbrëmë, rreth orës 21:00, persona të dyshuar kanë sulmuar zyrat e degës së PDK-së në Deçan. Përmes një xhami të thyer më herët të kësaj zyre, persona të dyshuar u kanë vënë flakën perdeve, dhe si pasojë e këtyre flakëve ka pasur dëme të perdeve, dhe jo më shumë dëme të mëdha brenda objektit,” ka njoftuar Ibraj, zëdhënësi i policisë së Pejës.
Zjarrvënien në këtë seli e dënoi Kryesia e Partisë Demokratike të Kosovës. “Aktet e tilla, që kanë motive të qarta politike dhe të cilat cenojnë pluralizmin, janë të papranueshme dhe të dënueshme. Partia Demokratike e Kosovës u bën thirrje të gjitha organeve kompetente që ky akt të ndriçohet sa më shpejt dhe autorët e kësaj vepre të shëmtuar të vihen para drejtësisë,” thuhet në reagimin e Kryesisë së PDK-së.
Ndërkaq, Lidhja Demokratike e Kosovës, “i konsideron këto akte të dhunshme vepër të njerëzve të cilët po përpiqen me çdo kusht dhe çdo mjet ta zhysin vendin në kaos dhe anarki, duke sulmuar me molotovë institucione publike, prona private, duke djegur makina të familjarëve të përfaqësuesve institucionalë, dhe tashmë duke sulmuar edhe selitë e partive shtetformuese”. /tesheshi.com/
