Në një tiradë të gjatë në parlament, deputeti Ben Blushi ka vënë theksin tek zhvillimet gjeopolitike në rajon duke u fokusuar fillimisht tek ajo çfarë po ndodh në Kosovë. Sipas tij, nuk ka dyshim se Serbia ka një projekt për të ndarë Kosovën, e që kjo mund të shndërrohet një ditë në një projekt edhe europian. Blushi tha se Kosova sot është më e dobët, si dhe vuri në dukje faktin që klasa e atjeshme politike nuk ka arritur të krijojë një kohezion.
Por për Blushin, është politika e jashtme e Tiranës zyrtare në këto vite e cila ka përgjegjësi të madhe për këto zhvillime. Ai ka akuzuar qeverinë për një politikë të jashtme të personalizuar – pra, e nënkuptar kjo sipas tekave të Ramës – duke thënë se në tre vjet janë sheqërosur marrëdhëniet me Serbinë, janë kriposur ato me Greqinë, ka një kaos në raportet me Maqedoninë, si dhe është luajtur ruletë ruse me SHBA.
Blushi dhe pozitën e të qënit anëtar të NATO-s e ka konsideruar si diçka formale. Kreu i LIBRA-s, i ka kërkuar politikës mbarëshqiptare që të ketë një vetëdije më të lartë në këto kohë të trazuara lidhur me fatin shqiptar të së nesërmes. /tesheshi.com/
