Çdo propozim për martesë duhet të jetë e pëlqyeshme, befasuese dhe e paharrueshme. Një i ri nga Huston i Teksasit në SHBA, me sa duket, në krizë për ide, e ka pësuar me të vërtetë rëndë, ndërsa po i kërkonte të dashurës së tij që të martoheshin bashkë.
24 vjeçari Vidal Valladeres ka menduar të bllokojë një autostradë për t’i propozuar të dashurës, 23-vjeçares Michelle Wycoff. Me ndihmën e miqve dhe të afërmve, Vidal ndaloi qarkullimin në autostradën I-45, duke parkuar makinat në mënyrë të tillë që askush të mos mund të kalonte në atë rrugë.
Kështu, mes personazh të inatosur që prisnin të kalonin e të përfundonin punët që kishin nisur, apo të shkonin në destinacionin e dëshiruar, Vidal është ulur në gjunjë përballë gjysmës së tij të ëmbël, e cila në fund pranoi dhe tha ‘Po’.
Mirëpo, siç raporton CNN, djaloshi ka thyer disa ligje të shtetit dhe rrezikon deri në 6 muaj burg. Në rast se ai merr dënimin maksimal, martesa, e parashikuar për në muajin mars, duhet të shtyhet. Shumë persona janë shfryrë në rrjetet sociale kundrejt bllokimit të autostradës, por Vidal ka kërkuar ndjesë: “Më vjen keq, por doja të bëja diçka të paharrueshme për të dashurën time”./tesheshi.com/
