Banorët e pjesës veriore të Kosovës kanë filluar t’i vuajnë pasojat ligjore pas refuzimit të tyre që t’u përmbahen ligjeve dhe rregullave të Kosovës. Për shkak të kësaj politike, po e pëson dhe edhe stafi administrativ, i cili nuk ka marrë pagën e marsit pasi xhirollogaritë komunale janë të bllokuara.
Këshilltarë komunalë shqiptarë thonë se pakënaqësia është e madhe, por për momentin nuk ka manifestim të saj përmes grevave apo bojkotit. Ata shpresojnë se brenda kësaj jave do t’i jepet zgjidhje kësaj çështjeje.
Gëzim Alushi, këshilltar komunal në Mitrovicën Veriore, nga radhët e AAK-së, ka thënë se edhe pse aktualisht nuk ka rrezik për bojkotim, frustrimi po rritet shkaku i bllokadës financiare.
“Pakënaqësia është e madhe, sepse shërbyesit civilë dhe ne këshilltarët komunalë jemi pa paga”, ka thënë Alushi. “Më e keqja është se nuk kemi mbajtur asnjë seancë këtë vit. Nuk i dimë arsyet pse ndodh kjo, kryesuesja komunale nuk po na fton. Ka mungesë komunikimi’, shkruan sot “Koha Ditore”.
Edhe zëvendëskryesuesi për komunitete në këtë komunë, Emir Azemi, thotë se janë duke i ndier pasojat nga mosmiratimi i buxheteve komunale. “Bllokimi institucional ka marrë përmasa edhe më të mëdha. As administrata komunale, as stafi politik nuk kanë marrë paga, pasi komuna nuk ka miratuar buxhetin në përputhje me qarkoren buxhetore të Ministrisë së Financave”, ka thënë ai.
