Sepp Blatter si Richard Nikson. Atë që gazetarët e New York Times e paralajmëruan ndodhi. Ndërkohë që është rizgjedhur me shumicë si kreu I FIFA-s vetëm pak kohë më pas ka dhënë dorëheqjen nga masa e madhe e skandalit, I cili rrezikon të shkatërrojë të gjithë Federatën ndërkombëtare të Futbollit.
Blatter ka njoftuar përmes një konference për shtyp nga Zyrihu i Zvicrës, largimin nga posti aktual.
Dorëheqja e tij nuk do të jetë e menjëhershme, pasi Blatter do të qëndrojë në krye të organizatës deri në mbajtjen e një Kongresi të jashtëzakonshëm, që siç njoftoi FIFA do të mbahet mes dhjetorit 2015 dhe marsit 2016, për të zgjedhur pasardhësin e tij.
79-vjeçari, gjatë deklaratës së tij për njoftimin e dorëheqjes, bëri thirrje për mbajtjen e Kongresit në një periudhë sa më të shpejtë të mundshme, për të zgjedhur pasuesin e tij. Blatter u zgjodh javën e kaluar, pavarësisht arrestimit të 7 zyrtarëve të lartë të FIFA-s, vetëm dy ditë përpara votimit, si pjesë e një hetimi të nisur nga FBI-ja amerikane.
“Mandati im, mesa duket nuk duket të ketë siguruar mbështetjen e të gjithëve”, tha Blatter ndër të tjera gjatë konferencës për shtyp.
