Presidenti, Hashim Thaçi u ka bërë thirrje partive politike që të lënë mënjanë inatet dhe interesat partiake për të krijuar institucionet e vendit dhe ekipin e unitetit.
“Kosova, para vetes, ka shumë sfida dhe nuk ka kohë për të humbur. Sukseset më të mëdha të këtij vendi janë arritur vetëm kur kemi qenë të bashkuar”, ka shkruar Thaçi në Facebook, pak minuta pas takimit të ndërmjetësuar të BE-së mes Kosovës dhe Serbisë.
Thaçi ka shkruar se Kosova duhet të përfaqësohet nga gjitha subjektet politike me qëllim që të mbyllet përfundimisht konflikti me Serbinë.
“Kosova, në këtë dialog, duhet të përfaqësohet e bashkuar si kurrë më parë, për të përmbyllur përjetësisht konfliktin njëshekullor me Serbinë dhe për t’i hapur rrugë paqes dhe mirëqenies së qytetarëve”, ka shkruar ai.
Kujtojmë se AAK dhe NISMA e kanë lënë të hapur mundësinë e bashkangjitjes së ekipit të unitetit për bisedimet me Serbinë, ndërsa Vetëvendosje ka thënë se nuk bashkohet para kërkesave të Vuçiçit. /tesheshi.com/
