Gjykata Kushtetuese e Kosovës ka pezulluar përkohësisht Marrëveshjen mes Prishtinës dhe Beogradit me ndërmjetësimin e BE-së për Asociacionin e Komunave me shumicë serbe.
Ky vendim është marrë deri në marrjen e vendimit përfundimtar nga ana e institucionit që interpreton ligjin themeltar të shtetit.
Vendimi i Kushtetueses së Kosovës është publikuar në faqen e internetit të institucionit, ndërkohë që kjo çështje ishte dërguar për vlerësim nga presidentja, Atifete Jahjaga.
Në njoftimin e Gjykatës Kushtetuese thuhet se, “në seancën e mbajtur më 10 nëntor 2015, Gjykata Kushtetuese e Republikës së Kosovës mbajti këshillime dhe njëherazi miratoi një masë të përkohshme në kërkesën e paraqitur nga Presidentja e Republikës së Kosovës Lidhur me vlerësimin e përputhshmërisë së ‘Asociacionit/Bashkësisë së komunave me shumicë serbe në Kosovë – Parimet e përgjithshme/Elementet kryesore’ me frymën e Kushtetutës së Republikës së Kosovës”.
Opozita e Kosovës ka bllokuar thuajse gjithë kohën Marrëveshjen të cilën e quan serbisht “Zajednica” duke përdorur gjithë “arsenalet e sulmit”, që nga vezët tek bombat me gaz lotsjellës. /tesheshi.com/
