Presidenti amerikan Joe Biden, tha të premten në mbrëmje në Uashington se Amerika dhe aleatët e saj nuk do të frikësohen nga kërcënimet e presidentit rus Vladimir Putin dhe iu drejtua këtij të fundit duke i thënë se SHBA-të do të “mbrojnë çdo pëllëmbë të territorit të NATO-s”.
Të premten, lideri i Rusisë nënshkroi dekrete për aneksimin e katër rajoneve të Ukrainës nga Rusia, të cilat vendet perëndimore, Bashkimi Evropian dhe NATO-ja e dënuan ashpër dhe Biden tha me këtë rast se SHBA nuk e njeh aneksimin e Zaporozhye, Kherson, Donetsk dhe Rajonet e Luganskut.
“Amerika dhe aleatët e saj nuk do të frikësohen, e theksoj. Ata nuk do të tremben nga Putini, nga fjalët dhe kërcënimet e tij të papërgjegjshme”, tha njeriu i parë i SHBA-së nga Shtëpia e Bardhë dhe theksoi se “Veprimet e Putinit janë shenjë se ai po kalon një kohë të vështirë”.
13 miliardë dollarë të tjera ndihmë
Si dëshmi për këtë, Biden përmendi “referendumet e rreme” për aneksimin e katër rajoneve të Ukrainës në Rusi.
“Shtetet e Bashkuara të Amerikës nuk do ta pranojnë kurrë. Dhe për të qenë i sinqertë: as bota nuk do ta pranojë kurrë. Ai nuk mund të marrë territorin e fqinjit të tij dhe t’i ikë, thjesht nuk mundet”, tha lideri amerikan në fjalën e tij.
Sipas tij, SHBA do të vazhdojë t’i japë Ukrainës ndihma ushtarake për mbrojtjen e saj dhe ai vend do të marrë 13 miliardë dollarë të tjerë nga Kongresi amerikan.
“Amerika është plotësisht e përgatitur me aleatët e saj të NATO-s për të mbrojtur çdo centimetër të territorit të NATO-s, çdo centimetër. Ndaj, z. Putin, dua që të më kuptosh shumë qartë. Çdo centimetër”, tha Biden. /tesheshi.com/
