Qeveria e përkohshme greke, e udhëhequr nga e para kryeministre, Vasiliki Thanu, bëri sot betimin. Kabineti i ri qeveritar do të përgatisë zgjedhjet e 20 shtatorit, dhe do ta ketë jetën të shkurtër. Greqia bëhet gati për zgjedhjet e pesta elektorale në gjashtë vite, pas dorëheqjes javën e shkuar të ish-kryeministrit Aleksis Cipras, i cili u detyrua ta lërë postin si pasojë e rebelimeve brenda partisë së tij.
Siç njofton zyra e presidentit grek, kreu i shtetit, Prokopis Pavlopulos, dhe kryeministrja, Vasiliki Thanu, nënshkruan sot një dekret që e shpërndan zyrtarisht parlamentin, përcakton zgjedhjet për në 20 shtator dhe vendos 1 tetorin si datë të hapjes së sesionit të parë të parlamentit të ri.
Vasiliki Thanu ka mbajtur postin e kryetares së Gjykatës së Lartë, dhe është e para femër që bëhet kryeministre e Greqisë. Ministër i Jashtëm u zgjodh diplomati veteran Petros Moliviatis, i cili ka qenë dy herë në të shkuarën në këtë detyrë.
Ndërkaq, i pari anketim ka treguar se Aleksis Cipras kryeson edhe pse ka patur shumë largime nga Syriza.
Një anketim në të përditshmen e majtë Efimerida ton Syntakton i dha Syriza-s 3.5 pikë udhëheqje kundrejt konservatorëve të Demokracisë së Re. Sipas anketimit, 23 për qind e votuesve do të mbështesnin partinë e Ciprasit në këtë moment, e 19.5 për qind do të votonin për Demokracinë e Re.
Mbështetur në të dhënat e këtij anketimi, 25.5 për qind e të përgjigjurve kanë rezultuar të jenë të pavendosur se për kë do të votojnë.
Syriza është përballur me një valë largimesh pas pakënaqësive të lindura ndaj Ciprasit për shkak të nënshkrimit të programit të tretë të shpëtimit, dhe një grup prej 25 ligjvënësish të vijës së ashpër kanë formuar një lëvizje të re politike, partinë “Uniteti Popullor”.
Anketimi i sotëm e tregon partinë e re, “Uniteti Popullor”, në kuotën e 3.5 përqindëshit. Kjo është një shifër paraprake, ndërsa ka ende kohë deri në zgjedhje. /tesheshi.com/
