Një numër grupesh kryengritësish sirianë kanë sulmuar së fundi një bazë artilerie të forcave të regjimit, në një përpjekje për jetë a vdekje për të çarë rrethimin e Halepit.
Observatori Sirian për të Drejtat e Njeriut thotë se një pjesë e bazës është marrë, ndërkohë që televizioni shtetëror sirian pretendon të kundërtën, duke njoftuar se rebelët janë zmbrapsur, e se shumë prej tyre janë vrarë.
Baza e artilerisë është rreth dy kilometra larg zonës së rrethuar të forcave kryengritëse. Ajo ka sasi të mëdha armatimi, duke u përdorur për të bombarsuar ato pjesë të qytetit të kontrolluar nga rebelët.
Kundërshtarët e regjimit të Esadit deklarojnë se e kanë shtënë në dorë bazën, e se tani synojnë të marrin një bazë municioni kundërajror. Sulmi i tyre cilësohet të ketë qenë më i madhi në vitet e fundit të konfliktit civil në Siri.
Zonat në lindje dhe në jugperëndim të Halepit, ashtu si pjesa rurale e tij, janë tashmë nën kontrollin e tyre.
Halepi është ndarë mes forcave qeveritare dhe atyre rebele që nga vera e katër viteve më parë. Rrethimi i zonës të kontrolluar nga rebelët nisi më 17 korrik, me gjendjen e 300.000 njerëzve në atë zonë që përkeqësohet nga dita në ditë.
Beteja për Halepin cilësohet si vendimtarja për të ardhmen e konfliktit në Siri. /tesheshi.com/
