Miratimi i Ligjit për gjuhën shqipe nga ana e qeverisë në Maqedoni, ka nxitur reagimin edhe të përfaqësuesve të Lëvizjes BESA, si partia më e madhe opozitare tek blloku politik shqiptarë.
Sipas Adnan Azizit, anëtar i Kryesisë Qendrore në Lëvizjen BESA, ky ligj është dëshmi se LSDM së bashku me koalicionin qeveritar, shqiptarët nuk i shohin si shtetformues por si “përkatësi etnike mbi 20%”. Ai vlerëson se gjuha shqipe duhet të jetë zyrtare në tërë territorin e shtetit dhe jo vetëm nivel lokal.
“Shqiptarët në Maqedoni janë komb shtetformues dhe jo “përkatësi tjetër etnike mbi 20%”.
Të gjitha arsyetimet janë të papranueshme. Pse çdoherë kompromisi bëhet në kurriz të shqiptarëve?
Shqiptarët në plan afatgjatë rrezikojnë shumëçka nëse vazhdojnë të bëjnë kompromise të dëmshme. Personalisht mendoj se çdo ndarje e shqiptarëve, qoftë edhe administrative është e pakuptimtë dhe e rrezikshme.
Gjuha shqipe duhet të jetë zyrtare në të gjithë territorin e Republikës së Maqedonisë e barabartë me gjuhën maqedone dhe mos respektimi i saj duhet të sanksionohet me ligj. Çdo gjë tjetër jashtë kësaj është politikë ditore, kampanjë parazgjedhore dhe propagandë qeveritare”, ka shkruar në rrjetin social facebook, Adnan Azizi.
Kujtojmë se zëvendëskryeministri për eurointegrime në Maqedoni, kuadër i BDI-së, Bujar Osmani, dje përmes një postimi në facebook, direkt nga mbledhja e qeverisë ka njoftuar opinionin për miratimin e Ligjit për Zyrtarizimin e gjuhës shqipe.
Ai përveç tjerash ka publikuar një pjesë të këtij ligji, me ç‘rast vërehet qartë, edhe siç thonë opinionistët e ndryshëm në Maqedoni, se nuk bëhet fjalë për zyrtarizim të gjuhës shqipe, por avancim të saj, pasi që gjuha shqipe nuk mund të implementohet në qytetet(komunat) ku shqiptarët janë nën 20 përqind.
(1) Në gjithë territorin e Republikës së Maqedonisë dhe në marrëdhëniet ndërkombëtare gjuhë zyrtare është gjuha maqedonase dhe shkrimi i saj cirilik.
(2) Gjuhë tjetër që e flasin së paku 20 për qind e qytetarëve (gjuhë shqipe), gjithashtu është gjuhë zyrtare dhe alfabet i saj, në përputhshmëri me ketë ligj.
(3) Në të gjitha organet të pushtetit qendror në Republikën e Maqedonisë, institucionet shtetërore, ndërmarrjet publike, drejtoritë, komisionet, personat juridik të cilët kryejnë autorizime publike në pajtim me ligjin dhe institucionet tjera, gjuhë zyrtare përskaj gjuhës maqedonase dhe shkrimit të saj është edhe gjuha që e flasin 20 për qind e qytetarëve të Republikës së Maqedonisë, në mënyrë të përcaktuar me këtë ligj. M.Krasniqi /tesheshi.com/
