Ish-kryeadministratori i parë ndërkombëtar i Kosovës së pasluftës, Bernard Kushner, njëherësh dhe ish-ministri i Jashtëm francez, ka zbuluar diç nga arsyeja e realitetit në veri të Kosoës, ndarja që e ka shoqëruar që pas përfundimit të luftës e që vijon dhe sot. Gjithçka është bërë me vetëdije nga ana e ndërkombëtarëve, me qëllimin e shmangies së një tjetër lufte.
“Veriu i Kosovës ka qenë i ndarë që në fillim pasi nuk dëshironim të sillnim një aksion luftarak që do të sillte sërish luftën”, ka thënë Kushner, gjatë një intervistë në Zona B në Klan Kosova.
“Një prej sukseseve të Kombeve të Bashkuara ka qenë të mos bëhej më luftë”, theksoi ai.
Ndër të tjera, Kushner ka folur për përjetimet e asaj periudhe, kur atij iu besua administrimi i situatës së pasluftës, duke dalë nga gojë e tij kjo thënie:
“Nuk kam qenë administrator, kam qenë mbreti i Kosovës”.
“Kam qenë përfaqësues i veçantë i Sekretarit të përgjithshëm të Kombeve të Bashkuara dhe është dashur ta implementoj Rezolutën e OBK-së, 1244, e cila kërkonte nga unë të ndërtoja një autonomi substanciale”, tha ish-kryeadministratori francez i Kosovës. /tesheshi.com/
