Për herë të parë që nga Lufta e Ftohtë, Gjermania po e rrit potencialin e vet ushtarak dhe po e modernizon ushtrinë.
‘’Pas një periudhe të gjatë çarmatosjeje dhe zvogëlimi të kapaciteteve ushtarake, Gjermania ka filluar përsëri të investojë për rritjen e kapacitetit të saj ushtarak,’’ shkruan Bild. Më tej thuhet se, “Gjermania është duke e bërë këtë për herë të parë që pas Luftës së Ftohtë.”
Ministrja gjermane e Mbrojtjes, Ursula von der Leyen, ka paralajmëruar se shteti i saj dëshiron që deri në vitin 2023 të krijojë 7.000 vende për ushtarë të rinj, si dhe 4.400 vende për punësim të stafit civil.
“Periudha e zvoglimit të kapaciteteve ushtarake ka mbaruar. Ka ardhur koha që ushtria e Gjermanisë të rritet përsëri,“ ka thënë ajo.
Bild shton më tej se Gjermania është përcaktuar për këtë politikë të re ushtarake pas kërcënimeve nga Rusia dhe ISIS-i.
Gjermania tashmë është e pranishme me forcat e saj në Siri dhe në Irak; atje ndodhen edhe avionët e tyre luftarakë Tornado.
Ka të dhëna se ky vend kërkon t’i dërgojë ushtarët e tij edhe në Libi.
Sipas analizave të ekspertëve, Gjermania do të duhej të kishte në dispozicion edhe 14.307 ushtarë shtesë gjer në vitin 2023.
“Ushtria gjermane duhet të modernizohet në të gjitha fushat. Ne ndodhemi nën presion, si kurrë më parë,“ ka deklaruar Von der Leyen. /tesheshi.com/
