Ish-kryeministri Sali Berisha ka akuzuar ashpër kundërshtarin e tij, kreun e qeverisë aktuale se po tenton të nxjerrë nga burgu një nga kapot e mëdhenj të krimit në vend: Aldo Baren, alias Alfred Shkurti.
Heqjen e mbrojtjes të dëshmitarit kyç në dosjen kundër Aldo Bares, Sali Berisha e lidh drejtpërdrejtë me emrin Edi Rama.
Përmes një postimi të gjatë në rrjetet sociale, ish-kryeministri akuzon kryeministrin aktual të vendit për lidhje me bandën e Lushnjes. Ai thotë se emri i Edi Ramës del në përgjimet e Enver Dondollakut, njëri prej drejtuesve të bandës famëkeqe, nga prokuroria e Firences në Itali.
Sipas Sali Berishës, heqja e Arben Kiçjas nga lista e dëshmitarëve të mbrojtur bëhet me një qëllim; lirimin e Aldo Bares.
“Edi Rama vepron sipas një plani te caktuar kriminal për të ndryshuar akuzat dhe dënimet Aldo Bares dhe vrasësve të tjerë të bandës së Lushnjes. Ai për këtë qëllim i hoqi mbrojtjen në vendin ku ishte strehuar Arben Kiçja, dëshmitarit guximtar i të gjitha krimeve të bandës së Lushnjes dhe bosit të saj, Aldo Bares”, thotë ish-kryeministri.
Aldo Bare vuan dënimin e dhënë në burgun e Peqinit, por për ish-kryeministrin Sali Berisha, jo si i burgosur, por si drejtues de fakto i institucionit. Berisha thotë se menjëherë pas heqjes së statusit si dëshmitar i mbrojtur, Arben Kiçja dhe familjarë të tij janë kërcënuar nga persona të lidhur me pushtetin.
“Burime të sigurta më njoftojnë se pas heqjes së statusit si dëshmitar i mbrojtur, Arben Kiçjas, ndaj tij emisarë të pushtetit dhe të bandës kanë bërë dhe bëjnë kërcënime me jetën e tij dhe të familjarëve në qoftë se ai nuk ndryshon dëshminë për Aldo Baren. Ndërkohë, siç e kam denoncuar dhe në Parlament dhe media, Rama ka përgatitur terrenin në Gjykatën e Lartë për rihapjen e procesit gjyqësor ndaj Aldo Bares dhe bandës së tij, me të cilën Ramën e lidhin shumë e shumë fije”, shkruan Berisha.
Në fund, ish-kryeministri u drejtohet institucioneve të tjera shtetërore, Presidentit të Republikës dhe Prokurorit të Përgjithshëm që të marrin masa dhe të mbrojnë Arben Kiçjan dhe të ndëshkojnë ligjërisht personat që e hoqën këtë emër nga statusi i dëshmitarit të mbrojtur nga shtetit.
