Qeveria serbe ul në mënyrë drastike numrin e shqiptarëve në Luginën e Preshevës duke shpallur shifrat sipas një regjistrimi të kryer përciptas që e kanë quajtur “vlerësim”.
Sipas qeverisë serbe, në tre komunat e Luginës jetojnë 75,342 banorë përkatësisht 48 mijë shqiptarë ndërkohë që po sipas saj bëhet fjalë për 56 mijë shqiptarë më pak se disa vite më parë.
Po si kanë firuar shqiptarët e Preshevës?! Me ironi drejtuesit e shqiptarëve theksojnë se nuk ka rënë as murtajë e as malaria, ndërkohë që lindshmëria ndër shqiptarë është mjaft e lartë.
Këto shifra nuk i kanë pranuar përfaqësuesit politikë të shqiptarëve në Preshevë, duke i quajtur të papranueshme dhe jo reale.
Kreu i Këshillit Nacional të Shqiptarëve Jonuz Musliu, ka deklaruar se delegacioni i shqiptarëve që merr pjesë në vlerësimin e numrit të banorëve për Preshevë, Bujanoc dhe Medvegjë nuk i ka pranuar shifrat e komisionit pranë ministrisë për Vetqeverisje Lokale, me të cilën thuhet në në tri komunat jetojnë më pak 5600 shqiptarë se sa para 13 viteve.
Komisioni, ku marrin pjesë përfaqësues nga Trupi Koordinues për Preshevë, Bujanoc dhe Medvegjë dhe antarë të bashkësisë ndërkombëtare, përfaqësues shqiptar dhe të tjerë kanë vlersuar se në Preshevë, Bujanoc dhe Medvegjë jetojnë 48.000 shqiptarë.
“Numri i banorëve është zvogluar sikur të kishte malarie këtu nga viti 2002 e këndej. Dihet se sa është nataliteti i shqiptarëve dhe nuk është reale që tani të jetë numri i banorëve më i vogël se në vitin 2002. Kur e kemi formuar këtë komision, ne kemi pritur që vlerësimi të jetë real, ndërsa ata në mënyrë tendecioze kanë marrë numrat” ka deklaruar Musliu.
Musliu theksoi se shqiptarën nuk e pranojnë një vlerësim të tillë të numrit të banorëve dhe kërkojnë që gjatë vlerësimit të numrit të shqiptarëve të merret parasysh edhe listat zgjedhore, numrin e pasaportave dhe letënjoftimeve të lëshuara, numrin e nxënësve ose numrin e orave matëse të rrymës elektrike.
Sipas vlerësimeve të fundit, në Bujanoc ka gjithsejt 38300 banorë, në Preshevë 29600 banorë ndërsa në Medvegjë 7442 banorë.
Procesit i vlerësimit ka filluar gjatë vizitës së zëvendës kryeministres së Serbisë Kori Udoviçki në Bujanoc me 3 mars të këtij viti.
Vlerësimi është bërë në bazë të metodologjisë të pranuar në takimin që është mbajtur me 12 qershor 2015 nga ana e liderëve shqiptar të Luginës së Preshevës dhe kryetarit të KNSH.
Procesi është realizuar në bashkëpunim me OSBE-në në Beograd, Ambasadën e SHBA-ve, Britanisë së Madhe dhe delegacionit të BE-së në Boegrad me ndërmjetësim të trupit Koordinues.
Vlerësimi i numrit të banorëve në komunën e Preshevës, Bujanocit dhe të Medvegjës në të ardhmen do të përdoret për të dhëna zyrtare deri në në regjistrimin e ardhshëm të popullsisë. /tesheshi.com/
