Nuk e ka gëlltitur fare Beogradi pranimin e Kosovës në UEFA dhe Serbia e ka kthyer në problem politik.
Ministri serb i Sporteve, Vanja Udoviçiq dhe Marko Gjuriq, kreu i Zyrës për Kosovën në qeverinë serbe, deklaruan se është bërë gati padia në emër të qeverisë kundër Kosovës në Gjykatën e Apelit Sportiv në Lozanë të Zvicrës.
Pra, pikërisht aty ku Serbia theu hundët dhe Shqipëria mori fitoren në tavolinë që e katapultoi në Europian.
Deklarata u bë në një konferencë të posaçme shtypi në Beograd ku u theksua se shteti do të ndihmojë Federatën e Futbollit të rrëzojë vendimin që sipas tyre “nuk e imagjinonin as separatistët”.
Udoviçiq dhe Gjuriq thanë se sporti ka rënë nën urdhërat e politikës.
“Ky vendim hap kutinë e Pandorës dhe anëtarësimin mund ta kërkojë çdo shoqatë në kontinent që nuk është shtet”, tha Gjuriq.
Ndërkaq, Beogradi ka marrë vendimin që të krijojë klube të serbëve të Kosovës që do të marrin pjesë në kampionatin e futbollit të Serbisë.
“Ata duhet ta dijnë dhe të mos ushqejën iluzione. Ne nuk humbim kurrë dhe asnjëherë nuk do të ndalemi së luftuari”, deklaroi i revoltuar kreu i Zyrës së Kosovës në qeverinë serbe.
Vanja Udoviçiq, pasi tha se u ushqyen orekset dhe u thyen parimet e UEFA-s shtoi se “ne do të përdorim të gjithë kontaktet, edhe ata personale për të rrëzuar vendimin dhe për këtë do të ketë negociata politikanësh të nivelit të lartë.”
Zyrtarët e Beogradit theksuan se do të përdorin në favor të tyre qëndrimin kundërshtar të Kosovës nga ana e Zvicrës, e cila i frikësohet largimit të lojtarëve nga kombëtarja helvetike.
Që prej ditës së sotme, zyrtarë të Beogradit do të vrapojnë në Zvicër për të arritur që të fitojnë në tavolinë atë që e humbën me votë.
Por a do ta arrijnë të prishin festën? Ku i dihet. Beteja ende nuk ka mbaruar.
/tesheshi.com/
